Аллагьдихъ инанмиш хьун
- Подробности
- Автор: Admin
Гьуьрметлу мусурманар! Малум тирвал, чи уьлкведин мусурманар яшамиш жезвай регионра, гьа жигьетдай яз Кьиблепатан Дагъустанда, иллаки чи лезги районра, гьайиф хьи, капIтIеат ийизвайбурун, мискIинриз физвайбурун, яни АллагьТааладиз ибадат ийизвайбурун кьадар лап тIимил я. Чи хуьрера гзафбуруз, гьакI жегьилриз, гьакI яшлу буруз, неинки капIтIеат, гьатта дуьаярни чизвач. Гьелбетда, им шад жедай кар туш. Ибур Аллагьдихъ инанмиш хьун ва Иман зайиф хьунин нетижаяр я.
Имандин сад лагьай, вирдалайни важиблу шартI – им 99 гуьзел тIварарин сагьиб тир Аллагьдихъ инанмиш хьун я.
Гьуьрметлу иманлу стхаяр! Гзаф инсанри чпин сергьятламишнавай фикирдалди, чилер-цавар, гъетер, рагъ, варз ва чилел алай кьван шейэр тIебиатди халкьнавайди я лугьуз тестикьарзава. Гьелбетда, а ксар гзаф ягъалмиш я. Лугьун лазим къведа, и дуьньядал са шейни дуьшуьшдай вич-вичиз арадал атайди туш, абур вири халкь авурди Виридалайни Виниз тир, Сад тир Аллагь я. Инал чна ихьтин са месэла гъин: са кас сефердиз фейила ам са касни авачир са баябан чуьлдиз акъатда. Ина адаз са зурба гуьрчег къеле аквада. Къениз гьахьна килигайла, адаз якъутривни къизилдив безетмишнавай, гьар са шей вичин кьадай чкайрал эцигна туькIуьрнаваз акурла, ам килигна тух тежез амукьна. И касди вичин авамвиляй и гуьрчег къеле ва ина авай кьван затIар къецепатан куьмек галачиз эцигнавайди я лагьана фикирна ва гьакIни и къеле эцигайди вуж ятIа лугьуз фикир ийиз башламишна. Ахпа адаз ана авай кьван затIарин тIварар, гьар са шей алай чка, къеле эцигунин къайда ва абур безетмишунин программа ва гьакIни абур идара авунин устав кхьенвай ктаб акурла, ада, икI лагьана: "Ингье и къеле эцигнавайди ва ам тадаракламишнавайди и ктаб я". Ктабдивай и къеле инсан галачиз эциг тежедайди ада кьатIанач. Гьа икI адан авамвили манасуз фикир арадал гъана. ГьакI хьайила, чавай ихьтин месэлаяр мадни гзаф гъиз жеда.
Чи Пайгъамбардивай (Аллагьдин салатни салам хьуй адал) Аллагь ни халкьна, Ам гьикI арадал атана лугьуз арабри хабар кьадай. Алим Ибн Арабиди "Ни халкьна Халкь авурди" суалдиз ада жаваб гудай: "Ихьтин суал анжах акьулсузрин фикирдиз къведа"
Асгьаби Анаса лугьудай: са сеферда Хайбар шегьердай чи Пайгъамбардин патав са шумуд кас атана, адавай хабар кьуна: "Я, Абу аль-Къасим, Аллагьди малаикар нурдикай, Адам руквадикай, шейтIан цIукай, цавар гумадикай (пардикай), чилер цин стIалрикай яратмишна. Гилавуна лагь: "Ам Вич квекай яратмишнавайди я". Аллагьдин кьадардалди Жабраил малаик арада аваз, гьа ихьтин суалриз жаваб яз Аллагь-Таалади чи Пайгъамбардиз (Аллагьдин салатни салам хьуй адал) "Ихлас" ("Руьгь михьи авун") сура ракъурна. Ана Аллагь-Таалади лугьузва (мана): "Я МухIаммад, вуна абуруз лагь: Ам – Аллагь сад я.
Яни:
I) Ам тек тир Аллагь ва Падишагь я. Адаз шерик авач, адалай гъейри маса аллагьар авач.
2) Ам вири дуьньядин сад тир Халикь я. Ада чан алай кьван затIариз ризкьи ганва, куьмек гуда, гъил къачуда ва я жаза гуда. Адалай гъейри садавайни и крар алакьдач.
3) Ам сад тир Аллагь я гьамиша авай ва гьамиша жедай. Ам гьамишанди я. Адаз эвел ва эхир кьил авач.
4) Адаз тухум авач, Ам сад я.