Инсандин асул зеррейрикай

Аллагь  чир хьанвай еке алимри мад ахъайзава: «Аллагьди инсанрин асул зерреяр (руьгьер) халкь авур вахтунда, абурукай мусурман зеррейрихъ элкъвена эвер гана: «Куьн вужар я ва Зун вуж я?» Абуру жаваб гана: «Вун чи Рабби я, чун Вун кIани Ви лукIар». И арада Аллагьди  лагьана: «Нагагь квез Зун кIанзаватIа, куьн Зи рекьелай са шейинивайни алудиз жедач». Абуру лагьана: «Чун ахтармиша, чун Ви рекьелай элячIдач!» Ахпа абуруз Аллагь-Таалади экъечIзавай рагъ хьиз дуьнья ва дуьньядин гуьзелвал (зинату ддунья) къалурна. Дуьньядин гуьзелвал акурла, зеррейрин цIудакай кIуьд пай, Аллагь  рикIелай алатна, чеб гьейранарай дуьньядихъ гьерекатна.

 Са пай амукьна. Гьа и са паюнизни Аллагьди суал гана: «Куьн вужар я ва Зун вуж я?» Абуру жаваб хгана: «Вун чи Рабби ва чун Вун хкянавай Ви лукIар я». Аллагь  хкянавай лукIарин рикIелай Ам са шейинивайни алудиз жедач лагьайла, абуру теклифна: «Чун ахтармиша!» Аллагьди абуруз Женнет ва ана авай няметар къалурна. Женнет акурла, амукьай са паюнин кIуьд пайни Женнетдин няметрин гуьгъуьниз фена. Мад анжах са пай амукьна. Аллагь-Таалади мад суал гана: «Куьн вужар я ва Зун вуж я?» Абуру жаваб гана: «Чун Вун хкянавай Ви лукIар я». И арада Аллагьди  мад лагьана: «Нагагь квез Зун кIанзаватIа, куь рикIелай Зун са шейинивайни алудиз жедач». Абуру лагьана: «Чун ахтармиша, чи рикIелай Вун алатдач!» Аллагьдини  абур жуьреба-жуьре шейэрин куьмекдалди ахтармишна, месела, цихъ къаних хьун, каш гун, мусибатар, хажалатар, бедбахтвилер кьилел атун. Амма гьи къайдада абур ахтармишнатIани абурун рикIелай Аллагь  алатнач. Аллагьдини  абуруз лагьана: «Дугъриданни, куьн Зун хкянавай лукIар я». Килиг стхаяр, дуьнья акурла мусурманрин кIуьд паюнин рикIелай Аллагь I алатна. Женнет акурла амукьайбурун кIуьд паюнин рикIелайни Аллагь алатна. Гьа икI, амукьай паюник гьикьван инсанар акатзаватIа яраб? Абур вужар ятIа? Абур пайгъамбарар ва абурун рекьиз табий жезвай инсанар: асгьабар, имамар ва чпин чирвилерихъ галаз кьурвал амал ийизвай алимар ва михьи инсанар я.

Лезгинский исламский просветительский портал