Кьадар-кьисметдихъ инанмишвал

Подробности

Автор: Ас-салам

Дуьньяда кьиле физвай вири гьерекатар, кIандатIа чпиз хъсанбур, кIандатIа писбур хьурай, инсанди ва я гьайванди ийизвай, вири анжах Аллагьдин  кьадардалди, Ада кхьенвай кьисметдалди жезвайдахъ мусурман инанмиш хьана кIанда. И кьисмет гьеле алем халкь ийидалди са шумуд агъзур йис виликамаз кхьенвай.

Амма им Аллагь-Таалади инсан хкядай мумкинвиликай магьрум авунва лагьай чIал туш.

 Халикьди инсандиз хъсан ва пис амалар хкядай мумкинвал ганва, хъсан кIвалахар писбурувай чара ийидайвал акьул ганва, гьакъикъи дин чирдайвал Ктабар ва пайгъамбарар ракъурнава. Инсанди хъсан ва я пис кIвалах ийиз хьайитIани вири Аллагьдин  ихтиярдалди ийизва. Гьавиляй лугьузва хьи, Аллагьдин  кьадар ва инсанди хкязавай шей сад-садаз акси жезвач. Эгер инсандиз хъсан ва пис кIвалах хкядай мумкинвал авачиртIа чи диндихъ гьич са манани жедачир.Гьихьтин амалар авурла суваб ва Аллагьдин  разивал жезватIа, гьихьтинбур авурла гунагь ва Аллагьдин  ажугъ жезватIа инсандал агакьарнава. ЧIуру кIвалахар ийидай мумкинвал Аллагьди  инсандиз гузватIани, Ам чIуру кIвалахрилай рази жезвач. Уьмуьр – им имтигьан я, гьавиляй Аллагьди  вуч хьайитIани хкядай мумкинвал ганва, гьа са вахтунда чIуру амалар хкяй тийидайвал къурху ийизва. Аллагьдин  азабдикай къутармиш ва бахтлу жез кIанзавай инсанди анжах хъсан амалар хкяна кIанда. Эгер ам ягъалмиш хьайитIа, гьасятда рикIин сидкьидай туба авун лазим я.  Са пис кIвалах авурдалай кьулухъ, ам заз Аллагьди  кьисмет авунвайди тир, лугьудай гьич садазни ихтияр авач. ИкI лугьузвай касдиз жаваб гуда: «Ваз Халикьди  кхьенвай кьисметдикай хабар авачир хьи. ЧIуру кар авун патал Ада вун мажбур авунач, хкядай мумкинвиликай магьрум авунач. Ваз писвал ийидай ва ам тийидай мумкинвал ганвай, амма вуна пис кIвалах хкяна ва авур гунагьрин гьакъиндай тубани авунач, нетижада вун жазадиз лайихлу хьана.  Аллагь-Таалади чавай гьич са гунагьни тавуна жув хуьн истемишзавач, жезмай кьван гунагьар тавун ва гунагь хьайитIа тадиз рикIин сидкьидай гъил къачун тIалабун Ада чаз чирзава.

 Инсандилай ийиз алакь тийизвай шей Аллагьди  адан хиве тунвач. Ада гьайванриз, яшар тамам (14,5 йис) тахьанвай аялриз, акьулдиз кьери ва пайгъамбаррин эвер гун агакь тавунвай инсанриз жаза гузвач хьи. Диндин истемишунар кьилиз акъудун анжах акьулдиз кьери тушир, яшар тамам хьанвай мусурмандин хиве тунва. Авунвай амалрин гьакъиндай вичи чарасуз жаваб гудайди чизвай инсанди вичиз ганвай хкядай мумкинвал хъсан патахъ ишлемишда ва Аллагьдин  ажугъ гъизвай амалрикай къерех жеда. ИкI хьайила, кьисметдихъ инанмиш хьуни инсандиз хъсан амалар ийидай ва писбурувай яргъа жедай рекье еке куьмек ийизва.

Аллагьдин  кьадар-кьисметдихъ инанмиш мусурмандин кьилел са бедбахтвал атайтIа ада сабур ийида, жезмай кьван сувабар къазанмишиз чалишмишвилер аквада. Вучиз лагьайтIа, адаз ам Аллагьдин  патай тирди чизва. Гьа и чирвал себеб хьана адан рикI секин жеда ва гзаф четинвилерикай азад жеда.