РАМАЗАНДИН ВАЦРА СИВ ХЬУН

Бисмиллягьи-р-рахlмани-р-рахlим Алемрин Раббидиз шукур, саламатвални хийир-дуьа чи Мугьаммад Пайгъамбардиз адан вири асгьабриз хьуй.

Сифте гаф

Рамазан- И варз мусурманар патал иллаки кьетIенди я. Гьаниз килигна и вацра абуру сивер хуьн лазим я. Рамазандин вацра сив хуьн яшар бегьем (акьулбалугъ) хьайи гьар са мусурман патал ферз я. Пайгъамбардин (Аллагьдин салатни салам хьуй адал) гьадисда лугьузвайвал, Рамазандин варз алукьнамаз, Женнетдин варар ахъа, Жегьеннемдин варар агал жезва.

Гьа са вахтунда мусурманар Исламдин рекьелай алуд тавун патал, абуруз зиян тагун патал шайтIанар кутIунзава. Эгер инсанриз Рамазандин вацрахъ авай кьван вири хъсанвилер (кьетIенвилер) чир хьанайтIа, абуруз и варз уьмуьрлух яз давам хьана кIан жедай. Рамазандин вацра сивер хуьзвайбуруз Сад Аллагьди ийизвай мергьяматлувилер 10 ва гьатта 700 сеферда, хъсан крар гьадалайни гзаф артухарзава.
Аллагь-Таалади  Пак гьадисда лагьанва: 
«Сивер Зун патал хуьзвайди я, гьавиляй абур хвейибуруз За регьимарни гуда». Яни сивер хуьнай ийизвай хъсанвилер пара (абурай гузвай сувабдин кьадар анжах Сад Аллагьдиз Вичиз чида) артухарзава. И вацра гунагьар квайбуруз чпин гунагьрилай гъил къачуз тадай мумкинвилер гузва.

 Рамазандин вацра сив хуьн гьар са мусурман патал ферз я.

Аллагь Тааля Къуръандани лагьанва (мана): «Рамазандин вацра инсанриз дуьз рехъ къалурдай ва гьахъ  батIулдивай къакъуддай Къуръан назил авунва»

(«Аль-Бакъара» сура, 185-аят).

 

«Квез сив хуьн хъсан я, эгер квез хабар аватIа»

 («аль-Бакъара»,184).

 

Пак гьадисда (Гьадису-ль-Къудси) Аллагь Тааляди лугьузва 

(мана):«Гьакъикъатда, сив хуьн зун патал я. Зун патал

тIуьн ва маса    крар  акъвазарзавайбуруз За сувабар  кхьида».

Маса гьадисда лугьузва: «Аллагь –Таалади лагьана: «Адаман хци вири крар вич патал (вич къутармиш хьун патал) ийизва, сив хуьнилай гъейри. Сив Зун патал хуьзвайди я ва Зун патал сив хвейи касдиз За сувабар кхьида»

Лезгинский исламский просветительский портал