СИВ ХЬУН АТIУЗВАЙ ГЬЕРЕКАТАР
- Подробности
- Автор: admin
Сив хьун атlузвай гьерекатар им я:
1) ТIуьн ва хъун.
Экуьнилай, яни экуьнин капI алукьунин вахтунилай, та рагъ акIидалди, яни гъетрен капI жедалди, тIуьникай ва хъуникай акъвазун лазим я. Идалайни гъейри, инсандин бедендин тIебии тIвеквенрай (сивяй, нерай, япарай, вилерай, вилик ва кьулухъ патан менфезрай) къенез са затI ракъурун къадагъа я. Месела; япарай къенез яд фидайвал авуна кIандач, пIапIрус чIугуна кIандач ва икI мад.
Амма сив гвайди рикIелай алатна къенез са затI ракъурайтIа, сив хуьн атIузвач, (эгер рикIел хтанамазди и кIвалах акъвазарайтIа). Нагагь сив гвайди чиз сивиз яд къачуртIа, месела дастамаз ийидайла ва я гьарарат кьин патал, хатадай туькьуьнайтIа, и дуьшуьшда сив хуьн атIузва. Экуьнахъ тIуьн тIуьрдалай гуьгъуьниз сив хъсандиз михьи авуна кIанда, фан са кьас ва дадни амукь тийидайвал. ТахьайтIа, сив кьурдалай кьулухъ, абур къенез фейитIа, сив хуьн атIуда. Гьа икI сив хуьнив гатIумда. Эгер михьи цуькIуьн туькьуьнайтIа, сив хуьн атIудач, амма балгъан хьайтIа, атIуда. Анжах балгъан сивиз татана къенез фейитIа, хата авач. Хьирхьамрай (десна) иви къвез хьайитIа ва ам цуькIуьндихъ галаз къенез фейитIа, сив хуьн атIузва.
2)Экъуьчун.
Сив хуьдай вахтунда кьасухдай экъуьчна кIандач, ида сив хуьн чIурзава. Амма вич-вичелай экъуьчайтIа хата авач, анжах сиве яд экъуьрна михьна кIанда.
3)Месин алакъаяр.
Сив хуьзвай вахтунда, яни экв малум хьайидалай гуьгъуьниз, рагъ акIидалди, папанни гъуьлуьн арада месин алакъаяр хьайитIа, неинки сив хкатзава, ам гьакI мурдарни (джунуб) жезва. Гьаниз килигна, ихьтин дуьшуьшра неинки сив хуьн къаза хъувун лазим я, гьакI акьалтзавай жермедиз жаваб гун чарасуз я (жерме анжах итимри гана кIанда). Жерме (кафарат) квекай ибарат я лагьайтIа, ам акьалтай касди ара датIана кьве вацра алава яз сивер хуьн хъувуна кIанда ва я, эгер жерме
акьалтнавай касдивай сагъсузвал себеб яз сивер кьаз жезвачтIа, ада кесибар тир 60 касдиз тIуьн гун лазим я. Сивер хуьзвай вахтунда гъуьлуьни папа сад-садал желбдай гьерекатар тавун лазим я. Йифиз месин алакъаяр хьанвай гъуьлуьзни папаз сив кьадалди вилик чпин беденар чуьхуьн меслят къалурзава. Эгер экв жедалди абур яд аладариз агакь тавуртIа, гьакI сив хуьзва. Анжах жезмай кьван фад аладар хъувуна кIанда. Инал ихьтин са кар рикIел гъун чарасуз я: месин алакъаяр хьанвай ксариз яд аваз тIагьарат къачуна дастамаз (гъилер чуьхуьн къачун) кьванни тавуна ксун, гьа гьалда амаз тIуьн-хъун авун меслят къалурзавач.
Къейд:
Паб-гъуьл тушир, яни некягьдик квачир ксарин арада месин алакъаяр хьун Исламди къадагъа ийизва. Гьаниз килигна, суьгьбет физвайди анжах некягьдик квай уьмуьрдин юлдашрикай я.
4) Оргазм.
Жув жувал алаз хьанвай оргазмди, гьихьтин себебдилай хьанватIани, яни месин алакъадилай ва я гьевес хкаждай маса гьерекатрилай (теменар, тIушунар ва мсб.) сив хуьн атIузва. Амма оргазм ахвара авайла хьайитIа (мая экъечIун), ида сив хуьн чIурзавач. Гъусул жендек чуьхуьн къачуна сив хуьн давамарда.
5) Дишегьли парталрик хьун.
Дишегьлийрин адет тир вацран кьилер (менструация) рагъ акIидалди хьайитIа сив хуьн атIузва.
6) Аял хайидалай гуьгъуьниз жезвай михьивилер.
7) Ридда авун (куфр авун)