СИВЕР ХЬУЬДАЙЛА СУННАТАР

Сивер хуьдайла кьиле тухун хъсан яз гьисабзавай суннат крар:

1) Геж тавуна вахтунда сив атIун, яни гъетрен купIунин вахт хьанмазди.

2) ТIуьн недалди вилик “Бисмиллягьи-ррахIмани- ррахIим” лугьун ва хвейи сив кьабулрай лагьана, махсус дуьа кIелун.

3) Экуьнахъ, вахтунда къарагъна фу тIуьн (сугьур).

4) Сив хвейибуруз нянихъ тIуьн гун (ифтIар).

5) Мез тапаррикай, буьгьтенрикай, гьуьжетрикай, маса касдикай чIурукIа рахуникай, хийирсуз рахунрикайни герек авачир гафарикай хуьн. Аллагь  Тааля куранда лагьана (мана): «Тапарриз яб гузвайбур къадагъа шей незвайбур я»

6) Вилер Аллагьди къалурзавай рекьелай алатдай патахъ килиг тийин.

7) Япар. Абуруз тапан, буьгьтендин, гьар гьихьтин хьайитIани чIуру гафарин ван тахьун лазим я. И кар патал чIуру гафар галукьзавай чкайрилай вахтунда кьил баштанна кIанда. Пайгъамбарди (Аллагьдин салатни салам хьуй адал) лагьана: «Вилерни замин я, япарни»

8) КIвачер. Абур кутуг тавур, герек авачир чкайриз финикай хуьн лазим я.

9) Гъилеривни чIуру крар, гьерекатар ийиз туна виже къведач.

10) Руфун гьарам шейэрикай хвена кIанда.

Аллагьдин Пайгъамбарди (Аллагьдин салатни салам хьуй адал) лагьанва: 

«Гзаф сив хуьзвайбуруз абурун сив хуьникай амукьдайди са къанихвал я»

(Ибн Мажагь).

11) КапI- тIеат ийин.

12) Къуръан кIелин ва адахъ яб акалин.

13) Мухаммад пайгьамбар  (Аллагьдин салатни салам хьуй адал) салават кlелун.

14) Зикр кlелун.

15) Исламдин чирвилер къачун.

16) Инсанриз куьмек ийин.

17) Мискинда игьтикаф авун.

18) Садака гун.

19) Хурмайралди сив хкудунихъ.

Ат-Тирмизидилай, Ан-Насаидилай, Агьмадалай ва Абу Давудалай атанвай гьадисда лугьузва: «Ни квекай сив хкудиз хьайитIа, хурмайралди хкудрай, вучиз лагьайтIа и карда берекат ава. Эгер хурмаяр авачтIа, целди хкудрай, вучиз лагьайтIа гьамни (яд) михьи ийизвай шейэрикай я».

Лезгинский исламский просветительский портал