Дишегьлийриз сурарал фидай ихтияр авани?

посещение могил женщинами

Итимриз сурарал фин къадагъа туш, гена, фейитIа хъсан яз гьисабзава. Сурарал (аз-зияра) фин виридалайни хъсан ва суваб авай кар яз гьисабзавай вахт хемис йикъан рагъдандин купIунилай (аль-аср) кьулухъ, гьа йикъан нянихъ, жуьмя кьиляй кьилди ва киш йикъан пакамахъ я. Бязи алимрин фикирдалди, гьяд йикъан нянихъай ислеян йикъан пакамдалдини кьенвайбурун сурарал фин абур патални хъсан яз гьисабзава.

 Дишегьлийрин гьакъиндай лагьайтIа, абуруз  кьилди сурарал фидай ихтияр ава, нагагь сурар гьа чеб яшамиш жезвай чкада (хуьр, шегьер) аваз хьайитIа. Нагагь сурар яшамиш жезвай чкадивай яргъа аваз хьайитIа, фидай ихтияр ава, анжах магьрам галаз, яни Шариатди ихтияр ганвай мукьва кас (итим, буба, дах, стха…), вични са шартIуналди, эгер абур пайгъамбаррин, авлияйрин, алимрин ва гьакIни лап багъри мукьвакьилийрин сурар яз хьайитIа. ТIвар кьунвай ксарилай гъейрибурун сурарал фин карагьат, яни лазимсуз кар яз гьисабзава, гьатта сурар гьа чеб яшамиш жезвай чкада аваз хьайитIани. Идалай гъейри, сурарал физвай дишегьлийри чарасуз лазим тир шартIарал амал авуна кIанда, яни итимди ва я къаюмвалзавай касди ихтияр гун лазим я, Шариатди истемишзавай къайдада алукIна кIанда, сурара дердигьал авуна кIандач, ишелар авуна кIандач, итимривай къерех хьана акъвазун лазим я. Нагагь вири и истемишунрал амал тавуртIа, дишегьлийриз сурарал фидай ихтияр авач. Пайгъамбардин  (Аллагьдин салатни  салам  хьуй адал) гьадисдал бинеламиш хьайитIа, винидихъ къейднавай шартIарал амал тавунай сурарал физвай дишегьлияр лянетламишда. Куьрелди лагьайтIа, сурарал финин мана адакай ибарат я хьи, Аллагь Тааладихъ кьенвайбурун гьакъиндай тIалабунар авун, Къуръан кIелун ва чи виликни гележегда вахт атайла ажал квайди рикIелай алуд тавун я. Нагагь дишегьлийри сурарал фин патал икьван шартIарал амал авуна кIанзаватIа, алишвериш ийиз вири дуьньядилай текдиз цIар илитIзавай дишегьлийрин гьакъиндай вуч лугьуз жеда?! Къуй Аллагьди  дишегьлийриз итимри къазанмишайдал рази хьана чпин кIвалера ацукьдай куьмек гурай! Гьар ни хьайитIани жуьмя юкъуз чпин диде бубадин сурарал кьил чIугуна анал «Ясин» кIелайтIа, ахьтиндаз сурада гьикьван гьарфар ва гафар аватIа, гьакьван гунагьар багъишда, гъил къачуда. 

Нагагь диде-бубадал чан аламайла абурун хатур хайи касди абур амачирла тахсиррилайни гъил къачун, диде-бубадин гунагьар багъишун тIалабайтIа, ахьтинди диде-бубадал чан аламаз абурун рикI динжарайдаз  ухшар жеда. Нагагь «Аль-Курси» аят кIелна Аллагьдивай  сурара кучуднавайбуруз сувабар тIалабайтIа, гьар са сурал яхцIур нур аватда ва сурар гьяркьуь жеда.

ГьакIни, ни «Ясин» сура кIелна адан суваб кьенвайбуруз бахшайтIа, сурара авайбурун виридан азабар кьезил жеда, кIелай касдиз сурара кучуднавайбурун кьадарда авай кьван сувабар гуда.

Лезгинский исламский просветительский портал