Гьижаб - иервал ва Аллагьдин разивал.

Подробности

Автор: Ас-салам

Эхиримжи вахтунда чи гьукуматда гьижабар алукIазвай рушарин кьадар артух жезва. Абурун адресдиз гьикI хъсан гафар лугьузватIа, гьакI чIурубурни лугьузва. Гьижаб алай руш вири дишегьлияр патал чешне яз гьисабзава, гьавиляй инсанриз адай гьич са гъалатIни акъат тавуна кIан жезва. Амма рикIелай алудна кIандач, абурни чун хьтин инсанар я, абурузни лайихлу ахлакьар ва нукьсанар хас я.

 ГьакI ятIани Аллагьдив мукьва хьун патал абуру гьижаб алукI тийизвай дишегьлийрилай гзаф чалишмишвилер аквазва.Гьуьрметлу вахар, квекай инсанар пис рахан тийидайвал, гьар са кам гьинал вегьезватIа, вуч ийизвайтIа, гьихьтин гафар сивяй акъудзаватIа килиг. Исламдин истемишунар кьилиз акъуд. Гьеле гьижаб алукI тийизвай дишегьлийризни за лугьузва: Исламдин парталар алукIайла дишегьли гуьзел жезва.Чи хизанда авайди са велед – зун тир. Заз вуч кIан хьайитIани диде-бубади маса къачузвай, зи парталар багьа, иербур тир, гьатта зи таяр рушар пехил жезвай, за алукIзавай хьтин либасар алукIиз чалишмишвилер аквазвай. Гьа икI давам хьана неинки гъуьлуьз фидалди, гьакI гъуьлуьз фейидалай кьулухъни. Дидеди заз гьамиша лугьудай: «Шалварар алукIмир, кьилел ягълух алукI…». Гьа икI йикъарикай са юкъуз ада… зи парталриз цIай яна. Гьа вахтунда заз са пис хъел атанай.Буба гьамиша кIвалахал алай тир ва ада чи арада жезвай гьерекатриз фикир гузвачир. Амма са гуьзел юкъуз, гьакъикъатда, ам гуьзел югъ тир! – зун ахварай аватна ва зи фикирар лап кIанелай дегиш хьанвай. А къайда дегиш хьанвай хьи, заз жуваз жув чир жезмачир. Зун кIвалах дегишариз, концертриз, шадвилин мярекатриз тефиз гьазур тир.  За и амалар вири туна. Гьакьван чIавалди за авур амалар рикIел хтайла заз регъуь жезвай, кIваляй экъечIиз кIан жезвачир ва дуст рушарин патавни зун мад хъфенач.  Куьн зи гафарин дуьз гъавурда акьукь, 
- зун садани мажбур авур туш, ам за жуван хушуналди хкягъай рехъ я. Ви рикI гьикI ахъа хьана лагьана куьне хабар кьуртIа, за лугьуда: «За чи алимрин вязериз, насигьатриз яб гузвай ва гьар гъилера заз са цIийи затI чир жезвай, гьа икI зи рикI хъуьтуьл хьана».Са сеферда заз зи дуст рушан кьилив физ кIан хьана. КилигайтIа, заз беден Исламди истемишзавай тегьерда кIевдай парталар авач. И арада дидедин парталар авай шкафдай заз кьадар жедай са либас жагъидатIа лугьуз зун къекъвез эгечIна. Эхирни са перем жагъана, ам алукIна зун куьчедал экъечIна. Заз акI авай хьи, налугьуди малаикри зун хуьзвай. Куьчеда авай инсанриз, чирхчирриз зун чир жезвачир. Бязибуру лугьузвай: «Адан кьил чIур хьана», бязибур гьакI мягьтел жезвай.
Къейд авун лазим я хьи, гьижаб алукI тийизвай вахтундани за са капI  ахъаяй туш, амма исятда, за гьар юкъуз туба ийизва, Аллагьдивай  зи гунагьрилай гъил къачун тIалабзава. Къуй Аллагь-Таалади гьар са дишегьлидиз гьижаб алукIдай къуват гурай! Амин.