Хъсан паб – хазина

Подробности

Автор: Admin

Пайгъамбардин (Аллагьдин салатни  салам  хьуй адал) папа Айшади  дишегь-лийрихъ элкъвена лагьана: «Эй дишегьлияр, нагагь квез куь итимрин вилик авай буржияр чизвайтIа, куьне куьн руквади кьунвайтIани, эвел куь итимрин чинрал алай руг михьдай».
 Гъуьлуьк хьун – им Аллагьдин  патай еке регьим, ам и дуьньяда амаз дишегьлидиз агъа дуьньядин шадвал къазанмишун патал ганвай мумкинвал я.

 Гьайиф хьи, и мумкинвал гзаф пай дишегьлийри акси яз ишлемишзава…Гъуьлуьнни папан уьмуьр ахтармишайтIа, чаз къе сада-садаз фикир гузвай, гьуьрмет ийизвай, хъуьтуьл рафтарвилер ийизвай тек бир хизанар жагъида. Виридалайни рикI тIарзавай кар ам я хьи, гьа ихьтин чIуру рафтарвилерин тахсиркар гзаф вахтара паб жезва. Бес дишегьли итимдин рикI аладардайвал, адаз четин хьайила куьмек гудайвал халкьнавачни?!
Эхь, итимдизни папаз сад хьтин ихтиярар хьана кIанзава лугьузвай инсанрин чалишмишвилерини са къайда таъсир авунва. Амма ихьтин суал арадал къвезва: «Абуруз кьведазни сад хьтин ихтиярар хьайила хизан гьикI яшамиш хьурай? Гьарма сад вич вичин иеси тир хизан хьун мумкин яни кьван?» Гьелбетда, хизандиз кьил хьун лазим я ва гьа и къуллугъдиз кутугай инсан итим я, паб ваъ.
Исятда дишегьлийриз вири кIвалахар чпин хиве къачуз кIанзава, пул къазанмишун патал гьатта чара гьукуматриз рекье гьатзава. Яни итимди авуна кIанзавай кьван вири кIвалахар папари ийизва, гьа икI абурукай кIвалин иесияр жезва, гьа са вахтунда итимди са шейни тийиз йикъар йифер акъудзава. Ахпа кIвалин иесидин къуллугъ вичин гъиле кьур папа вичиз четинзава, итимди кIвалахзавач, ризкьи къазанмишзавач лугьуз шикаятарни ийизва.
Эй, гьуьрметлу вах, бес вуна итимдин кIвалахарни ви хиве кьурла, ада вуч ийида? Адаз амукьзавайди нез, хъваз, ксун я. Регьимлу ва Арифдар Аллагь-Таалади инсанар патал адалатлу къанунар эцигнава, гьа и къанунриз табий жезвай инсанди регьятдиз уьмуьр кечирмишзава. Папакай рахайтIа, адан хиве Аллагьди анжах итимдиз яб гун тунва. Са шакни алачиз чун халкь авунвай Халикьдиз  чалай гьар садалай гьи кIвалах хъсандиз алакьзаватIа чизва, гьавиляй ада везифаярни итимдинни папан арада абурун алакьунриз килигна пайнава.
Женнет къазанмишун патал дишегьлиди анжах кьве кIвалах авун лазим я: итимдиз муьтIуьгъ хьун ва вичин диндин ферзер тамамарун. Итимдин хиве авай кьван везифайрихъ галаз гекъигайла, месела, паб ва аялар хуьн, абуруз гьалал ризкьи къазанмишун, абур яшамиш жедай лайихлу чкадалди таъминарун, диндин чирвилер гун; папан хиве четин гьич са шейни авач. Иниз килигна, папа итимдихъ галаз хъсан рафтарвал ва адаз гьуьрмет авуна кIанда. Аллагьдин Расулди (Аллагьдин салатни  салам  хьуй адал) лагьана: «Им фана дуьнья я, и дуьньяда авай виридалайни хъсан шей – хъсан паб я» (Муслим). Итимдин чка кьаз чалишмиш тахьана, и дуьньда авай «виридалайни хъсанди» жез алахъайтIа хъсан тушни бес?! Папан Женнетдин куьлег – итимдин гафар я: «Зун валай рази я, зун валай рази я, зун валай рази я!»
Къуй Аллагь-Таалади гьар са мусурман дишегьлидиз и гуьзел гафарин ван къведайвал авурай! Амин.