Дишегьлидиз парикмахервиле кIвалахдай ихтияр авани?

Подробности

Автор: Admin

– Зун дишегьлийрин деллекханадин (салон красоты) сагьиб я. Ана дишегьлийрин чIарар рангада твазва, абуруз гуьрчег прическаяр, гьакIни маникюр, педикюр ийизва. Заз им гунагь кар я лагьана ван атанва, вучиз лагьайтIа ихьтин чкайриз къвезвай дишегьлияр чпиз чарадан итимар килигун патал дамахарзавайбур я лугьузва. ГьакIни, зун гъавурда турвал, ина заз итимрин кьилер кьадай ихтиярни авач. За вуч авун лазим я – салон кIевун лазим яни? Ихьтин дуьшуьшда вуч авуртIа жеда ва я вуч тавуртIа хъсан я?

– Эгер чун месэладиз марифатдин барадай килигайтIа, ихьтин кар акъвазарайтIа хъсан я, вучиз лагьайтIа гзаф пай дишегьлийри винидихъ лагьанвай крар (чIарар рангада тун, гуьрчег прическаяр, маникюр, педикюр авун) къадагъа авунвай гунагь рекьера ишлемишзава. Шариатдикай рахайтIа, эгер чна агъадихъ тIвар кьадай къадагъайриз салонда рехъ гузвачтIа, адан кIвалахдиз ихтияр ганва.

Шариатдин къадагъаяр:

1. Гъуьлуьк галачир дишегьлидиз чIарар чIулав рангада твадай ихтияр авач. Гъулуьз фенвай дишегьлидивай и кар анжах вичин гъуьлуьн ихтияр аваз авуртIа жеда.

2. Гъуьлуьк квай дишегьлидиз анжах гъуьлуьн ихтияр аваз вичин чIарар кьадай (атIудай, куьруь ийидай) ихтияр ава.

3. Дишегьлидиз тIебии (натуральный) чIарар (гьатта вичин чIарарни) ва чпин як тIуьн Шариатди къадагъа авунвай гьайванрин чIарар кухтуна вичин чIарар яргъи хъийидай ихти-яр авач. И кар гъуьлуьн ихтияр аваз авуртIа жеда, вични анжах тIебии тушир (искусственный) чIарар ва я чпин як нез ихтияр авай гьайванрин чIарар ишлемишна.

4. Татуировка авун къадагъа авунва.

5. РацIамар акъудун. Абур шуькIуь авун патал акъудун гьарам я. Анжах са гьихьтин ятIани азар себеб яз и кар авун чарасуз хьайитIа, ам ийидай ихтияр ава.

6. Гъуьлуьк квачир дишегьлийрин чинриз косметика ягъун къадагъа авунва. Ихтияр ава гъуьлуьк квай дишегьлидиз, гъуьлуьн ихтияр аваз, анжах гъуьл патал и кар ийидай.

7. Къадагъа я сарар хци авун, абуруз чарх гун, са бязи артистри чеб гуьрчег акун патал ийизвайди хьиз.

Мадни, гъуьлуьк галай дишегьлидиз гъуьлуьн ихтиярдалди вичин кIвачерни гъилер хнада тун меслят къалурнава.

 Гъуьлуьк квачир дишегьлидиз и кар карагьат (нежелательное) я. Гъуьлуьк квачир дишегьлидиз къадагъа я вичин кIвачерни гъилер чIулав рангада тун, кикериз чIулав ва я хнадик какадарна маса ранг ягъун, нехишар чIугун. Вири и крар гъуьлуьк квай дишегьлидиз анжах гъуьлуьн ихтиярдалди ийидай ихтияр ава.

Дишегьлийрин салонра – дишегьлийри, итимрин салонрани – анжах итимри кIвалахна кIанда.Пак тир гьадисрикай сада Аллагь-Таалади  Пайгъамбардин (Аллагьдин салатни  салам  хьуй адал) гафаралди вичин винел патан акунар дегишарзавай инсанар негьзава. Анжах и къадагъадик Шариатдалди себеб аваз и кар ийизвай инсанар акатзавач. Аквадай набутвал, бедендин кимивал, эйбежервал авайбуруз Шариатди абур туьхкIуьр хъийидай ихтияр гузва. Гьелбетда, ихьтин крар ийизвай салонрикай хийирни ава, эгер абуру чпин кIвалахда Шариатдин къанунрал амал ийиз хьайитIа.

Мадни са кар рикIелай алудна виже къведач. Шариатда ихьтин къанун ава – гьар са рехъ, яни ихтияр ганвай кар гьарам жезва, эгер са вахт алатайла а кар къадагъа авунвай кар авун патал ишлемишиз хьайитIа.