Гьижаб руьгьдал алукIин

Подробности

Автор: Admin

Гьижаб руьгьдал алукIин Чна вири йикъар сад хьиз гатIумзава: чинни сарар чуьхуьзва, чIарар эвягъзава, гьар гьикI хьайитIани, гуьзгуьдизни килигзава. Хуш жеда, жув хъсан аквадай чIавуз. Аламатдин кIвалах ам я хьи, чун сятералди гуьзгуьдай чи суьретдиз килигда, амма гьич садрани жуван рикIиз вил ядач. Гуьзгуьдин вилик чIагурдайла, чун чаз гьар са патахъай дикъетдивди килигда, вири иер ятIа, туштIа лугьуз. Бес рикI? Вуч жеда кьван, дикъетдивди жуван вилериз килигайтIа?

Ви рикIел аламани - са гьафтедин идалай вилик вуна итимдиз акьадай гафар лагьанай? Акьунар хьана куьтягь хьана, куь арадавай ьалакъаяр мад чимибур хъхьана, амма рикIел хкваш: вуна багъишламиш лагьанайни, лагьаначирни? Вилери ваз жаваб гуда, вучиз лагьайтIа, ви вилер ви рикIин гуьзгуь я. РикI лагьайтIа, мукьва инсанриз дакIанвал авурдалай кьулухъ садрани секин жедач! Вилери вун са тIимил йикъар идалай вилик пакаман кпIунал кIанз-дакIанз гьикI къарагънайтIа, рикIел хкида…. Вучиз? Вучиз лагьайтIа, вун геждалди телевизордиз килигиз амукьнай. Лагь кван – са гьихьтин ятIани кинодиз эхирдал кьван килигун-им капI авунилай важиблу яни?

Къе мад вун гуьзгуьдин вилик акъвазнава. Иер ягълух, дамах гвачир яргъи перем - ви винел патан акунар шариатдив лап кьадайбур. Амма, вун? Вуж я вун? Вири крар рикIин сидкьидай ийизвани вуна?! Фикир ая, ви туьтуьна акIанвай, вав ачухдаказ нефес къачуз тан тийизвай шел, гьакIан ичIи чкадал арадал атанани мегер? Вуна вуч лугьузва - ам гьинай атайди я? Ам вири ви амалри, фикирри ва вун Аллагьдивай яргъаз ийизвай крари арадал гъанвайди я. Ви беден тIазва, амма вуна и кIвалахдиз бегьем фикиргузвач.

Яраб вун вич галатнавач жал? Масабурун гъалатIарни, синихар эхиз тахьуникай…Жуваз пуларин гуьгъуьна гьатнавай и дуьнья пара кIан хьуникай…Чпин файдасузвилиз фикир гун тийиз, вун гьейранарзавай, гуьзел шейэринни инсанрин винел патан акунрин метлебсузвиликай… Жувавай-жуваз, гьижаб кьилел алукIайла, руьгьдал «алукIиз» рикIелай физвайди хиве кьаз тахьуникай.

…Гьикьван адаз дакIан тиртIани вичи-вичиз хиве кьаз, и фикирар буш чкадал арадал атайбур тушир, са гьихьтин ятIани гьикмет абурухъ авазва. Аллагьдиз шукур, Халикьди чаз чи уьмуьр къенин йикъалай цIийи кьилелай михьи чар ахъайна дуьздаказ давамардай мумкинвал ганва. Умар ибн аль-ХатIтIаба (Аллах рази хьуй) лугьудай: «Масада куь гьахъ-гьисаб ийидалди куьне куь гьахъ-гьисаб ая, масад алцумдалди куьне куь гьар са кам алцум. Куь пакадин йикъан саламатвал – им къе куьне ийизвай куь гъахъ-гьисаб я. Къачузвай гьар са кам эхират патал ая, а югъ атайла, чи гьич са сирни ачух тахьана амукьдач».

Садра са мусурман итимдивай хабар кьуна: «Вуна, къецел экъечIдайла, тюбетейка вучиз алукIзавач?» Ада икI жаваб гана: «Кьилинди, а тюбетейка руьгьдал хьун важиблу я, кьилел жедалди». Играми гьижаб алай дишегьлиярни рушар! Зи багьа тир диндин вахар! Зун къе квехъ галаз рахун - им жув-жувахъ элкъвена рахун я. Заз куьн са важиблу фикирдин гъавурда тваз кIанзава. И чилел физвай уьмуьрди чун акI алдатмишзава хьи, бязи вахтара гьижаб алай мусурман дишегьлийрин, чеб гьакIан са гуьзел жинсинин векилар туширди рикIелай физва. Чун Исламдин михьивилинни гуьрчегвилин, Халикьдиз табий тирди къалурзавай лишан я. Чаз килигайла, къвалав гвайбурун виридан Аллагь  рикIел хквезва. Им виридалайни важиблу крарикай сад я. Чи винел патан акунар чкадиз хкидайла, къене падни къайдада тун лазим я, чна ийизвай крариз, лугьузвай гафариз къимет гана кIанда. Я Аллагь! Я чи Халикь! Куьмек це чаз чи винел падни, къене падни сад-садав кьадайвал чкадиз хкиз, Вавай яргъа ийизвай шейэр рикIелай алудиз куьмек це. Куьмек це жезмай кьван Ви гъавурди акьаз, чалай и дуьньядани, муькуь дуьньядани Вун рази жедайвал! Амин.