Рамазандин вацра сив хуьнин лайихлувиликай гьадисар

1. Абу Гьурайради ахъайна хьи, Пайгъамбарди (Аллагьдин салатни  салам  хьуй адал)  лагьана: «Аллагьдихъ  инанмиш яз ва Адан патай сувабдик умуд кваз Рамазандин вацра сивер хвейи касдин виликан вири гунагьрилай гъил къачуда»

(Бухари, Муслим).

 

2. Ибн Гьиббана ва Байгьакъиди Абу Саид Худридилай (Аллагь рзи хьуй) Пайгъамбардин (Аллагьдин салатни  салам  хьуй адал)  гьадис агакьарна:

«Рамазандин вацра сивер хвейи, Аллагьдин эмирар кьилиз акъудай ва Адан къадагъайривай яргъа хьайи инсан виликан гунагьрикай михьи жеда».

 

3. Имам Агьмада, Байгьакъиди, Баззара Абу Гьурайрадилай (Аллагь рзи хьуй)  Пайгъамбардин (Аллагьдин салатни  салам  хьуй адал)  гьадис агакьарна:

«Зи умматдиз виликан умматриз тахьай вад тафаватлувал ганва:

1) сив хуьзвайдан сивяй къвезвай атир Аллагьдиз  мискдин нидилайни хуш я;

2) сив хуьдай арада бедендин вири паяри гунагьрилай гъил къачун тIалабзава;

3) Аллагь-Таалади гьар юкъуз женнет безетми-шзава ва лугьузва: «Четинвилер кьулухъ туна Зи лукIариз вахъ элкъвез кIанзава»;

4) Рамазандин вацра иблис къандалра твазва ва адавай маса варцара хьиз вич тухуз жезвач;

5) сивер хвейибурун гунагьрилай эхиримжи йифиз гъил къачузва».

И арада Пайгъамбардивай (Аллагьдин салатни  салам  хьуй адал)  хабар кьуна: «Гунагьрилай «Лайлатуль Къадр» йифиз гъил къачузвани?» Пайгъамбарди (Аллагьдин салатни  салам  хьуй адал)  жаваб гана: «Ваъ, хъсан кIвалах авуна куьтягьнамазди адал эвез агакьарда».

 

4. Байгьакъиди Жабир бин Абдуллагьалай (Аллагь рзи хьуй)  агакьарнавай гьадисда лагьанва:

«Зи умматдиз Аллагьди  виликан пайгъамбарриз тагай вад шей ганва:

1) Рамазан вацран сад лагьай йифиз Аллагь  Вичин регьимдалди абуруз килигзава, низ Аллагь  Вичин регьимдалди килигайтIа, адаз азаб гьич гудач;

2) сив хуьзвайдан сивяй нянин кьиляй къвезвай атир Аллагьдиз  мискдин нидилайни ширин я;

3) малаикри сивер хуьзвайбурун гунагьрилай гъил къачун тIалабзава;

4) Аллагь-Таалади женнетдиз эмирзава: «Вун Зи лукIар кьабулиз гьазур хьухь, безетмиш хьухь, дуьньядин четинвилер туна абур Зи регьимдин ва жумартлувилин кIвализ ял ягъиз къведа»;

5) Рамазандин эхиримжи йиф алукьайла, абур вири гунагьрикай михьи жеда.

 

И арада кIватI хьанвайбурукай сада Пайгъамбардивай (Аллагьдин салатни  салам  хьуй адал)  жузуна: «Ам «Лайлатуль Къадр» яни?» Пайгъамбарди (Аллагьдин салатни  салам  хьуй адал)  жаваб гана: «Ваъ, бес устIарди кIвалах куьтягьайла адаз гьакъи гуз акур тушни ваз?!» 

Скачать книгу

 

Лезгинский исламский просветительский портал