Алверчидиз Женнет ва я Жегьеннем!

Подробности

Автор: Admin

Алвердал машгъул хьун - им Исламда виридалайни хъсан кеспийрикай сад яз гьисабзава. Гьакъисагъ алверчияр Къияматдин юкъуз михьи ксарихъ галаз къарагъарда. Гьа са вахтунда инсанар алдатмишарзавай алверчияр Жегьеннемда куда лагьанва. Къуй Аллагьди чун, чаз кIанибур ва чун кIанибур вири Жегьеннемдикай хуьрай! Алверда таб ийизвай алверчи акурла, адаз акьул гун гьар са мусурмандин буржи я.

Са затI маса гудайла, лазим тир кьадар тагана муьштери алцурарун алай вахтунда адетдин кардиз элкъвенва.

Алверда таб авурла, гьихьтин еке гунагь жезватIа чаз Къуръанда лагьанвай гафариз фикир гайитIа, чир жеда (мана):

وَيْلٌ لِلْمُطَفِّفِينَ

«Алверда таб ийизвай инсанрин жаза Жегьеннем я» 

(«Аль-МутIаффифун» сура, 1-аят).

И аят ракъурунин себеб ам хьана хьи, Мединада авай Абу Жугьайна лугьудай са алверчидихъ кьве уьлчме авай: гъвечIиди ва чIехиди. Суьрсет маса къачудайла, ада гъвечIидал алцумзавай, маса гудайла – чIехидал. Пайгъамбардиз  (Аллагьдин салатни  салам  хьуй адал) и кас акурла, Аллагь-Таалади винидихъ гъайи аят ракъурна.

Абу Аббаса (Аллагь рази хьуй)  ахъайна: «Са сеферда Пайгъамбарди  (Аллагьдин салатни  салам  хьуй адал) лагьана: «Вад шей вад шейинай!» Асгьабри хабар кьуна: «И гафарин мана вуч я?» Ада  (Аллагьдин салатни  салам  хьуй адал) жаваб гана:

«1. КутIуннавай икьрар инсанри кьилиз акъуддач – Аллагьди  абурал душманар гьалдарда;

2. Аллагьдин  Къанундал асаслу хьана дуван ийидач – Аллагьди  абурал кесибвал ракъурда;

3. Гьикьван гзаф абурун арада явавал (чIуру рекье хьун) артух хьайитIа, гьакьван кьиникьарни гзаф жеда;

4. Алверда таб ийиз хьайитIа, Аллагьди  абурал къати гарар, бегьерсузвал ракъурда, абурун техилдилай берекат вахчуда;

5. Закат гудач – Аллагьди  абурал кьурамат ракъурда».

Малик бин Динара    (Аллагь рази хьуй) ахъайна: «Зи къунши алверчи тир. Са сеферда, ам чандик квайди чир хьайила, зун адан кьилив фена. Алверчиди эхир нефесдин азабда аваз гьарайзавай: «ЦIаюнин дагълар, цIаюнин дагълар!». За адавай вуна вуч лугьузва лагьана хабар кьуна. «Заз кьве уьлчме авай, садалди за жуваз алцумзавай ва муькьудалди - муьштерийриз. Гьа кьве уьлчмедикай цIаюнин кьве дагъ хьанва. Гьар гъилера абур сад-сада акьурла зи тIал къати жезва». Гьа и азабда аваз ада чанни гана».

Муьштерияр са гьикI хьайитIани алцурарзавай инсанриз Аллагь-Таалади Жегьеннемда махсус кIам гьазурнава, адан тIвар Вайлун я. Эгер аниз и дуьньядин са дагъ вегьейтIа, ам са легьзеда цIрана куьтягь жеда. Гьихьтин зурба азаб гьазурнаватIа куьне фикир це! Аллагьди  Вичи хуьрай! Виликан девирра яшамиш хьайи еке валийри лугьудай: «Вири алверчияр Жегьеннемда жеда лагьана гила амаз нетижа акъудайтIа жеда, вучиз лагьайтIа, абурукай гзаф паюни са гьикI хьайитIани муьштерияр алцурарзава». 

Пайгъамбарди  (Аллагьдин салатни  салам  хьуй адал) алверчийриз лугьузвай: «Квелай вилик яшамиш хьайи халкьар гьелек авур пеше куьне исятда гъиле кьунва». Им алвердал машгъул хьун ихтияр авач лагьай чIал туш, и гафаралди алверчийриз насигьат ийизва, абур игьтиятлу жедайвал, чпин кIвалах ийидайла Аллагьдихъай  кичIевал гьиссдайвал.

Мад Пайгъамбарди  (Аллагьдин салатни  салам  хьуй адал) лагьана: «Ни чун алцурарайтIа, ам чакай туш!» Маса гьадисда лагьанва: «Тапархъандин чка Жегьеннем я». Ихьтин гьадисар гзаф ава, за фикирзава, рикIер гьеле умудсузвилин мичIивили кьун тавунвай ксариз ибур бес жеда.