Масадаз къалурун патал хъсан амалар авун

Пехилвилелай алатайла, руьгьдин виридалайни чIуру азаррикай сад – рикIин сидкьидай Аллагь  патал амалар тавун я. Маса инсанриз жув хъсанди яз къалурун патал, абуруз бегенмиш жедайвал ибадат авун рияъ я.

Рияъ – им чинебан ширк я. Вучиз лагьайтIа, са ибадат ийидай вахтунда инсанди ам Аллагь патал тавурла, акси яз, инсанриз къалурун патал авурла, ам гьа инсанриз ибадат авур мисал жезва.  

Нагагь къурху тахьайтIа, гьар са мусурманди  рияъ авун мумкин я. Инсанрин гьалар ахтармишайтIа, чаз аквада хьи, пара инсанри хъсан кIвалахар чпелай масабуру тарифар авун патал ийизва. И кар Пайгъамбардин (Аллагьдин салатни  салам  хьуй адал) гьадисдини тестикьарзава: «Аллагь-Таалади Къияматдин юкъуз шагьиддиз лугьуда: «Вун Жегьеннемдиз алад». Шагьидди лугьуда: «Я Аллагь! Бес за дин патал, Вуна къалурай рехъ хуьн патал тухвай женгера чан гана!» Аллагьди  адаз лугьуда: «Вуна анжах ви викIегьвални кьегьалвал къалурун патал, ваз инсанри игит лугьудайвал чан гана. Вакай абуру гьакI лагьана ва вуна ви суваб чилел аламаз къачуна. Зи патав ваз пай амач».

Ибн Зугьайриди Пайгъамбардиз (Аллагьдин салатни  салам  хьуй адал) лагьана: «Я Расуляллагь! За хъсан амалар Аллагь  паталди ийизва, амма абурукай инсанриз хабар хьайила, заз шад жезва». Пайгъамбардини (Аллагьдин салатни  салам  хьуй адал) жаваб гана: «Аллагьдилай  гъейри маса мурад аваз хьайитIа, Аллагьди кьабулзавач». Аллагьдин Расулди (Аллагьдин салатни  салам  хьуй адал) лагьана: «ГъвечIи ширкдикай къурху хьухь». Асгьабри хабар кьуна: «ГъвечIи ширк вуч я?» Ада жаваб гана: «Ам рияъ я». Мад Пайгъамбарди (Аллагьдин салатни  салам  хьуй адал) лагьана: «Къияматдин юкъуз инсанриз лугьуда: «Аллагьдилай  гъейри маса инсанар патал ибадат авурбуру чпин суваб гьа инсанривай вахчурай». Яни гьи касди хьайитIани, хъсан амал ва я ибадат инсанриз къалурун патал, гьуьрмет къазанмишун ва машгьур хьун патал авуртIа, адан суваб инсанривай вахчурай.

Са инсанди гьар йикъан пакамаз фад къарагъиз Къуръан кIелзавай. Са сеферда адаз вичин къунши къарагънавайди хабар хьана ва адаз вичи кIелзавай Къуръандин ван жедайвал сес хкажна.

Идалай кьулухъ адаз ахварай Къияматдин югъ алукьнаваз ва вичиз хъсан амалрин сувабар гузваз акуна, амма кIелай са кьадар чкадин суваб ганач ва ада лагьана: «Бес за гьа чкани кIелай тир!» «А паюнин суваб жува къуншидивай вахчу!» - жаваб гана адаз. Маса гьадисда лагьанва: «Жегьеннемдин къене са кIам ава. Гьар юкъуз вишелайни гзаф сеферда Жегьеннемди вич гьа кIамухъай къутармишун тIалабзава. Гьа и  кIам рияъ ийизвай инсанриз гьазурнавайди я». Мад Аллагьдин Расулди (Аллагьдин салатни  салам  хьуй адал) лагьана: «Виридалайни заз зи умматдин гьакъиндай кичIезвай шей чинебан ширк я». Адавай жузуна: «Я Расуляллагь (Аллагьдин салатни  салам  хьуй адал), чинебан ширк вуч я?» Аллагьдин Расулди (Аллагьдин салатни  салам  хьуй адал) жаваб гана: «Ам рияъ я!» И гафари асгьабар пара пашманарна. Абур пашман хьайи къайда акурла, Пайгъамбарди (Аллагьдин салатни  салам  хьуй адал) лагьана: «Чинебан ширкдикай хуьдай шей за квез чирдани?» Ва ихьтин дуьа кIелна: «Я Аллагь, за Вавай тIалабзава! Ваз ибадат ийидайла, чиз-чиз ва  чин тийиз ширк авуникай зун хуьх. Ва за жувалай гъил къачун тIалабзава».

Лезгинский исламский просветительский портал