Руш низ гъуьлуьз гуда?

Подробности

Автор: Admin

Мерва шегьерда Нугь бин Марьям лугьудай са инсан яшамиш жезвай. Ам шегьердин регьбер ва къази тир. Аллагьди  адаз гзаф няметар, девлет ва хъсан, гуьзел руш багъишнавай. Адан руш гъуьлуьз це лугьуз девлетлу ва къуллугърал алай пара инсанар атана, амма ада абурукай гьич саданни рикI шадарнач. Руш низ гъуьлуьз гудатIа чин тийиз адан кьил квахьнавай, гьатта ада лугьузвай: «Эгер за руш са касдиз гъуьлуьз гайитIа, масадаз хъел къведа». 

Нугьаз цуьк акъуднавай емишрин багъ авай. ГьакIни адаз Аллагьдихъай  кичIе, гунагьрикай яргъа жезвай Мубарак лугьудай индиви лукI авай. Ада лукIраз вичин багъдал къаравул хьун эмирна ва ам багъ хуьз фена. Ингье, лукIра багъ хуьз кьве варз хьанвай.

Йикъарикай са юкъуз иеси багъдиз атана ва лукIраз вичив ципицIдин са кул вугун тIалабна. Ада иесидив ципицIдин са кул вугана, амма ам цуруди яз хьана. Иесиди вичив маса кул вугун истемишна. ЛукIра адав мад са кул вугана, амни цуруди яз хьана. Иесиди адавай хабар кьуна: «Вучиз вуна заз икьван еке багъдай анжах цуру ципицIар гузва?» ЛукIра жаваб гана: «Вучиз лагьайтIа заз гьина ширин ва гьина цуру ципицIар аватIа чизвач». Иесидай гьарай акъатна: «Ажайиб я, вун и багъда аваз кьве варз хьана, идалай кьулухъ вуна гьина ширин ва гьина цуру ципицIар аватIа ваз чизвач лугьузвани?!» ЛукIра жаваб гана: «Аллагьдал  кьин хьуй, за и багъдай гьич са емишни дадмишнач, гьавиляй заз гьина ширин ва гьина цуру ципицIар аватIа чизвач». Тажуб хьайи иесиди жузуна: «Бес вучиз вуна багъда авай емишар незвач?» ЛукIра жаваб гана: «Вучиз лагьайтIа вуна заз ам хуьн эмирна, тIуьн ваъ. За ваз таб ийизвач хьи». Мягьтел хьайи къазиди адаз хийир дуьа авуна: «Къуй Аллагьди  ви дугъривал хуьрай!» Ам и гада гзаф акьуллуди тирдан гъавурда акьуна ва лагьана:  «Ваз чир хьухь, заз гуьрчег са руш ава, ам гъуьлуьз це лугьуз девлет ва халкьдин арада гьуьрмет авай пара инсанар атана, амма заз ам низ гъуьлуьз гудатIа чизвач. Заз са меслят къалура?» ЛукIра жаваб гана: «Ислам къведалди хьайи бутпересар хъсан тухум авай инсандихъ, чувударни хашпараяр иервилихъ къекъвезвай, амма Аллагьдин Расулдин (Аллагьдин салатни  салам  хьуй адал) девирда инсанар имандихъ ва адалат-лувилихъ къекъвезвай, алай вахтунда лагьайтIа, мал девлетдихъ къекъвезва. И кьуд шейиникай ваз вуч кIандатIа хкягъа». Къазидини адаз лагьана: «За иман ва адалатлувал хкяна ва жуван руш ваз гъуьлуьз гуда, вучиз лагьайтIа вун адалатлу, иман авай, Аллагьдихъай  кичIе ва дугъри инсан я». ЛукIра жаваб гана: «Эй зи иеси, зун лукI ва чIулав индияви я, вуна заз ви руш гъуьлуьз гана залай рази яз амукьдани? Вуна зун ви пулунихъ са мус ятIани маса къачунвай хьи». Къазиди адаз яб ганач ва кар кьилиз акъудун патал кIвализ эверна. Къазиди вичин папаз лагьана: «Чир хьухь, индиядай тир и гада имандал кIеви ва Аллагьдихъай  кичIеди я. Заз адан ада-латлувал бегенмиш хьана ва чи руш адаз гъуьлуьз гун кьетIна. Вуна вуч лугьуда?» Папа жаваб гана: «Ваз хъсандиз чида. За ви ниятдикай рушаз хабар гуда ва адан жаваб вал агакьарда». Дидеди бубадин ниятдикай рушаз хабар гана ва ада лагьана: «Куьне заз вуч лагьайтIа, за гьа кIвалах ийида, Аллагьдин эмирдиз ва куь эмирдиз аси жедач». Гьа икI, къазиди вичин руш Мубараказ гъуьлуьз гана. Абуруз Абдуллагь лугьудай хва хьана. Гьа и гада исятда вири дуьньяда Абдуллагь ибн Мубарак – лугьуз машгьур я. Ам гунагьрихъай яргъа жезвай, гьадисар ахъайзавай еке алим тир. Къияматдин югъ алукьдалди адалай агакьнавай гьадисрикай инсанри менфят хкудда.