Пайгъамбардин (Аллагьдин салатни салам хьуй адал), уьмуьрдай итижлу малуматар

Подробности

Автор: Admin

Кябе эцигунин карда иштирак авун

Кябе – им Аллагьдиз  къуллугъ авун патал чилин винел эцигнавай сад лагьай кIвал я. Сифте яз Кябе Адама (Адал салам хьуй) эцигна ва ам гьа чIавузни исятда алай чкадал эцигнай. Аллагьди  Адаманни (Адал салам хьуй) Гьавадин патав Жабраил малаик (Адал салам хьуй) ракъурна ва абуруз Вичиз къуллугъдай чка эцигун буйругъна. Жабраила чилел гележегдин Кябедин план чIугуна. Эцигунар акьалтIарайдалай кьулухъ, Сад тир Аллагьди Адамаз (Адал салам хьуй) Кябедал тIаваф авун буйругъна. Амма са кьадар вахтар алатайла къизгъин вакъиайринни тIебиатдин шартIарин таъсирдик кваз Кябе чкIана.

 Сифте яз Кябе цIийи кьилелай эциг хъувурди пайгъамбаррин буба Ибрагьим (Адал салам хьуй) я. Ада ам Аллагьдин  эмирдалди мушрикрин (гзаф гъуцариз икрамзавайбур) килиса (виликан Кябе) алай чкадал эциг хъувуна. Ибрагьима (Адал салам хьуй) эхцигай Кябе яргъалди амукьна, амма, марфарни тIурфанар себеб яз, ам къайдадикай хкатнавай. Къурейшитар кьиле аваз араб тайифайрин регьберри Кябе къайдадик кухтун кьетIна. И делилдай чаз аквазвайвал, меккевияр ата-бубайрилай инихъ, гьатта Ибрагьималай (Адал салам хьуй) инихъ Кябедив еке гьуьрметдивди эгечIзавай. Мугьаммадани (Аллагьдин салатни салам хьуй адал), Кябе туькIуьр хъувунин карда иштиракна. ЧIулав къван эхцигдай чкадив агакьайла, меккевийрин арада ам эхцигдай касдин патахъай гьуьжетар арадал атана. Гьар са тайифадиз чIулав къван эхцигдай кас чпикай хьун кIанзавай. Гьуьжетар гьатта ивияр экъичунал аватзавай. Эхирни абуру ихьтин къарар кьабулна: Кябедихъ фидай Бану Шайбагь лугьудай варарай гьахьай сад лагьай касдивай къван ни эцигдатIа хабар кьада. Вирида яраб сифте вуж къведатIа лугьуз гуьзлемишзавай. Са кьадар вахт алатайла варарай Мугьаммад (Аллагьдин салатни салам хьуй адал), гьахьна. Ам чкадал эхцигун патал Мугьаммад e виридалайни хъсан кас тирдал вири рази хьана. Вучиз лагьайтIа Мугьаммад (Аллагьдин салатни салам хьуй адал), гьахълу, намуслу инсан яз виридаз чизвай, гьаниз килигна адан гафунал гаф са касдини эцигдачир. Инални Мугьаммада (Аллагьдин салатни салам хьуй адал), вири тайифаяр рази жедайвал, месэла камаллувилелди гьялдай рехъ жагъурна. Ада чIулав къван вичин халатдин юкьвал эцигна ва тайифайрин регьберривай а халатдин пипIер кьуна ам чкадал кьван тухун тIалабна, ахпа Пайгъамбарди (Аллагьдин салатни салам хьуй адал), къван къачуна лазим тир чкадал вичи эцигна, ам анал гилани алама.