Пуд лаваш

Подробности

Автор: Admin

Са сеферда Иса пайгъамбар (Адал салам хьуй) вичин юлдаш галаз фу нез ацукьнавай, абурухъ кьведахъ пуд лаваш фу авай. Сад Исади (Адал салам хьуй)  муькуьдини адан юлдашди тIуьна, идалай гуьгъуьниз Иса (Адал салам хьуй)  яд хъун патал къарагъна. Хтай чIавуз адаз пуд лагьай лаваш суфрадал ахкунач. Исади (Адал салам хьуй)  лаваш гьиниз фена лагьана хабар кьуна. Суфрадин кьилихъ ацукьнавай адан юлдашди вичиз чидач лагьана жаваб гана. ИкI абур рекье гьат хъувуна.

 Тамай фидайла, гишин хьанвай абуру гъуьрч авуна. Гъуьрчен як тIуьрдалай кьулухъ Исади (Адал салам хьуй)  амукьай кIарабар кIватI хъувуна ва лагьана: «Аллагьдин  эмирдалди къарагъ!» Гъуьрч авур гьайвандал чан хтана ва къарагъна кат хъувуна. Исади (Адал салам хьуй)  вичихъ галай юлдашдивай жузун хъувуна: «Ваз и аламат къалурай Аллагьдин  хатурдай хьайитIани пуд лагьай лаваш гьиниз фенатIа лагь». И касди мад са жаваб гана: «Чидач!» Абур мад рекье гьат хъувуна ва вацIал дуьшуьш хьана. Исади (Адал салам хьуй)  вичин юлдашдин гъил кьуна ва вацIун ятарин винелай фена. Идалай гуьгъуьниз ам мад вичин юлдашдихъ элкъвена: «Ваз и аламат къалурай Аллагьдин  хатурдай пуд лагьай лаваш гьиниз фенатIа лагь». Юлдашди мад хиве кьунач, вичиз чидач лагьана. Исади (Адал салам хьуй)  вичин рехъ давамар хъувуна. Са кьадар рекьиз фейила, пайгъамбар  акъвазна къванерин хара кIватIна ва лагьана: «Аллагьдин эмирдалди куьн къизилриз элкъуьгъ!» Къванерин харадикай къизилрин хара хьана. Исади (Адал салам хьуй)  абур пуд патал пайна лагьана: «Къизилрин и хара ваз, са пай заз ва пуд лагьай пайни лаваш тIуьр касдиз». И гафарин ван хьайила адан юлдашдай гьарай акъатна: «Лаваш тIуьрди зун я, зун!» Исади (Адал салам хьуй)  къизилар вири а касдиз туна вич кьилди рекье гьат хъувуна. Къизилрин кьилихъ серсер хьана амукьнавайдал бейхабар кьве кас расалмиш жеда. Икьван девлет акурла абуруз къизилрин иеси яна кьена вири чпиз вахчуз кIан жеда. Анжах и касди абуруз лугьуда: «Куьне зун рекьимир, ша чна къизилар пуд патал пайин». Къизилар пай авурдалай кьулухъ абуруз гишин хьана ва сад фу къачуз фин меслят авуна. Недай шей къачуз рекье турда вичи-вичикди фикирда: «За абурухъ галаз къизилар пай вучиз ийида, за фу зегьерламишда ва абур кьейила вири къизирин иеси анжах са зун жеда». Къизилрин кьилихъ галамай кьве касдини меслят ийида: «Къизилар пуд патал пайдач. Фу гваз хтайди чна кьведа яна рекьида». Фу гваз хтайди къизилрин кьилихъ акъвазай кьведа яна кьена ва агъу кутунвай фу тIуьрла абур кьведни кьена.

Вахтар алатайла и чкадин патавай Иса пайгъамбар (Адал салам хьуй)  вичин диндал алай юлдашар галаз фида. Къизилрин патав кьенвай пуд касдин мейитрал гъил туькIуьрна ада лугьуда: «Ингье, и дуьньядин суйдиз, ам гьихьтинди ятIа куьн хъсандиз килиг. И дуьнья дикай яргъа хьухь!»