Гьуд пайгъамбар (Адал салам хьуй)

Подробности

Автор: admin

Гьуд пайгъамбардикайни (Адал салам хьуй) `Ад тIвар алай тайифайрикай риваят

Яманда (Йеменда) дуланмиш жезвай `Ад тIвар алай тайифада вири жуьредин сергьятрилай алатнавай къайдадин нагьакьанвилеризни гунагь крариз рехъ гуз гатIумна. Абур Саман несилар тир, амма Халикь рикIелай алудна хьиз, бутриз ибадат ийиз эгечIна.

Аквадай гьаларай Халикьди абурулай кьакьан ва къуватлу несил мад Чилел халкьнавачир жеди. 

Абурукай виридалайни буйдиз гъвечIидал пуд-къад юкI алай, акьулбалугъвиливни абур виш йисалай алатайла агакьзавай. Вири абур яргъалди яшамиш жезвайбур тир. Кьиникь абуруз виш йисалай са сеферда аквадай вахтарни авай. Гьакьван абур хъсан яшамиш жезвай. Абурун кьиле Жалижан лугьудай буйдиз кьакьан, виш юкI алай, инсафсузвилерал гьалтайла машгьур кас, истисмарчи акъвазнавай. Адай хъсан кар акъатуник халкьдин гьич умудни квачир.

`Ад несилдин тайифаяр дуьз рекьел хкун патал абурал Гьуд (Адал салам хьуй) пайгъамбар рекье туна. Амма абуру адан эвер гунар инкар авуна. Гьудахъ (Адал салам хьуй) яб акал тавур такабур `Ад тайифайриз чпин бахт жагъанач. Чпин еке жендекар авай несилрал дамах ийизвай абуру жазадив агакьдач лагьана фикирзавай, чпин чIехи алакьунрик, ийизвай крарик умуд кутазвай ва чпел гъалибвал къазанмишдай мад са касни авачирдахъ кIевелай инанмиш тир. Чпин арада саки пудкъанницIуд йисан къене яшамиш хьайи Гьудан (Адал салам хьуй) эвер гунризни килиг тавуна, абуру ам кваз кьунач. Абуру ам къванцин хура туна ва чеб физвай алатнавай рекьелай элячIнач, генани артухандилай чиркинвилера гьатна.  И вахтунда Гьуда (Адал салам хьуй) Аллагьдивай абурун дишегьлияр сивинсуз авун тIалабна, абурун тайифа авайдалай тIимил хьун патал. Гьа и йисуз абуруз садазни са аял кьванни хьанач. Абуруз чпин вилералди Гьудан  (Адал салам хьуй) тIалабун кьилиз акъатайди акуна, ятIани гьа и аламатдини абуруз таъсирнач. Аллагьди абурал къурамат вегьена ва ирид йисан къене марфар къванач. Тайифайрин саки чIехи пай каша атIана кьена. И вахтунда вири патал са адет авай, инанмиш тир ва инанмиш туширбур вири Меккадиз фена, Аллагьидивай чпелай бедбехтвал алудун тIалабзавай. `Ад тайифадикайни марф къун патал Аллагьдивай тIалабун патал са десте фена. Абуруз аламат яз цавал пуд циф – яруди, лацуди ва чIулавди алаз акуна. Винедавай сесини абуруз и пуд цифедикай сад хкягъун эмирна, абуруни чIулав цифеди марф гъида лагьана фикирна хьиз, гьа чIулавди хкяна. ЧIулав циф Ямандихъ фена. `Ад тайифадиз ам акурла гзаф шад хьана. Амма Аллагьдин къудратдалди инанмишсуз `Ад несилдал чеб тамарзлу тир марфадин паталай гарар агакьна. Акъваз тийиз муьжуьд юкъузни ирид йифиз тарар пунарай акъудзавай, кIвалер чкIурзавай, инсанар тухузвай тIурфан гьатна. Я абур рекьизвачир, я яшамиш жедайвални тазвачир, муьтIуьгъ туширбур къванцин марфадалди жазаламишзавай. Абур уьмуьрдинни ажалдин арада авай ва гузвай азабар эхиз тежедай хьтинбур тир. Къванцин харайрин кIаникай диндар ксариз гьар юкъуз цIур ийизвай сесерин ван къведай.`Ад тайифа патал зурба бедбахтвилиз элкъвей тIурфан Гьудахъ  (Адал салам хьуй)инанмиш хьайибурув агатнач. Бутриз икрамзавайбур эхиз тежедай хьтин хажалатдин парцик квай чIавуз, абурун арадай муъминар сагъсаламатдиз амукьна.

`Ад тайифадикай Меккадиз рекье турбурун дестедилай алатайла мад са касни амукьнач.

150 йисан яшда аваз Агькъаф дагъдал Гьуд (Адал салам хьуй) агъа дуьньядиз фена.