Цегв – ажайиб махлукьат

Подробности

Автор: Admin

Са мус ятIани Палестинада кьурамат себеб яз халкьдик каш акатна. Им Сулейман пайгъамбардин (Адал салам хьуй) девирда хьайи вакъиа я. Пайгъамбар (Аллагьдин салатни  салам хьуй адал), вичин халкь галаз дуьзен чуьлдиз, Аллагьдивай  марф тIалабиз фена. Сад лагьана адаз кьве кIвачел акъвазна, гъилер хкажна Аллагьдивай тIалабзавай цегв акуна, ада икI лугьузвай: «Я Аллагь-Таала! Чун,  цеквер, - Ви махлукьатрикай виридалайни гъвечIибур я. Чавай Ви берекат галачиз яшамиш жезвач. Минет хьуй, чаз тIуьн ракъура, инсанрин гунагьриз килигна чаз азаб гумир. Минет хьуй, чилер къацу ва тарар еке жедайвал чаз марф къура, икI хьанайтIа къуьлни экъечIдай ва  чаз тIуьн жедай».

Сулейман пайгъамбардиз (Адал салам хьуй) гьайванрин чIал чидай. Вичин халкьдихъ элкъвена, ада лагьана: «Ша чун кIвалериз хъфин.Чаз и цекврен дуьа бес я». Ахпа кIеви марф къвана ва кьуд пад къацу хьана.
Цегв – акьуллу гьашарат я. Чими йикъара ада вичиз къуьл кIватIзава, вучиз лагьайтIа мекьи хьайила, адаз вичивай куьчейра тIуьнихъ къекъвез техжедайди чизва. Къуьлуьн тварар ламувиляй экъечIиз кичIела ада абур са шумуд чкадал пайзава. Вичи кIватнавай къуьл чIур тахьун патал цеквре вахт вахтунилай кьурурзава. Чилин кIаникай тIеквенар акъудзава, цекверин кIвал яд къенез тефидайвал мягькемдиз эцигзава. Цеквери, маса гьайванриз килигайла, чпелай кьве сеферда залан шейэр ялзава. Абуру кIвале амай хизанрикайни фикирзава. Цекврез гзаф къуьл алай чка акур чIавуз ада муькуь цеквериз хабар гузва ва абурни галаз гьа чкадиз хъфизва. Абурун арада гьамиша гьа ихьтин низам ава.

И карди къалурзава хьи, цеквери сада-садаз ем жагъуриз куьмек гузва, чпи-чеб хуьн патал кIвалахзава. Им инсандиз акси лишан я, бязи вахтара адаз вичин мукьвабурухъ гелкъвез кIанзавач ва гишилавай инсанрин гъавурда гьатиз кIанзавач. И ажайиб цеквер-махлукьатрикай мад са вакъиа ава. Са сеферда Сулейман пайгъамбар (Адал салам хьуй) инсанрихъ, жинерихъ ва къушарихъ галаз сиягьатда авай чIавуз абурал цекверин дере гьалтна. Сулейман пайгъамбар (Адал салам хьуй) ва адан кьушунар и дередиз гьахьиз гьазур хьана.

И арада цекверин чIехидаз чпин дередиз гьахьзавайбур акуна ва муькуь цеквериз кIвалера чуьнуьх хьун буйругъна, вучиз лагьайтIа хабарсуз инсанри ва жинерри кIурар илисна абур кьин тийидайвал. Цегверин чIехида лагьай гафарин ван атай чIавуз  Сулейман пайгъамбар (Адал салам хьуй) хъуьрена ва вичихъ галайбуруз цеквер чуьнуьх жедалди вил алаз акъвазун эмирна. «Чакай садани цеквериз азият гана кIандач», - лагьана ада. Ахпа Сулейман пайгъамбарди (Адал салам хьуй) цекверин чIехидахъ элкъвена лагьана: «ГьикI зи халкьди ваз ва муькуь цвеквериз азаб гун мумкин я? Бес ваз чизвачни, зун Аллагь- Таалади инсанриз ракъурнавай илчи я, зун гьахъсуз садрани жедач?» Цекверин регьберди жаваб гана: «Я Аллагьдин илчи! Заз цеквериз кIур гунихъай кIичезвачир, зи мурад абур темягь фидай затIарикай хуьн тир. Ви девлетлувал ва гьейбатлувал акунайтIа, абуру Аллагь-Тааладиз шукур авун рикIелай алудун мумкин тир!»