Къабила Гьабил кьиникь (Къабилни Гьабил)

Подробности

Автор: Ас салам

Инсаният Адамалайни (адал салам хьуй) Гьавадилай гатIумна. Абуруз аялар кьветхверар жезвай: гадани руш. Лаюсани Гьабил садра, ахпа Къабилни Икълима хана.

Гьабилал малкъарадиз килигун ихтибарна. Къабила цанрал гуьзчивал тухун лазим тир. ИкI чпел ихтибарнавай кIвалахар кьилиз акъудиз ивидин стхаярни вахар акьулбалугъвилин яшариз агакьна. Аллагьди  Адамаз (адал салам хьуй)  Гьабил Икълимадал эвленмишун эмирна.

 Икълимадиз Къабилаз гъуьлуьз фидай ихтияр авачир, вучиз лагьайтIа абур кьветхверар тир. Къабила гьалалдикай туба авуна гьарамда вил туна ва Лаюса вичин пабвиле къачуз кIан хьанач, Икълимадал эвленмиш жез кIан хьана. Гьикьван Аллагьдихъай кичIе хьухь лагьанатIани, ада Икълима Гьабилаз гудач лагьана. Бахтсуз Къабил вичин гафунал акъвазнавай, Адама (адал салам хьуй)  и гьуьжет акьалтIарун патал къурбанд авун меслятна. Меслят авурвал, Икълима, нин къурбанд Аллагьди кьабулайтIа, адаз кьисмет жедайвал тир.

 Гьабила виридалайни хъсан хеб гъана, Къабила лагьайтIа, дигмиш тахьанвай къуьл. Къурбанд гуьнедал эцигна хьиз, абур вил алаз акъвазна. И арада цаварилай лацу циф эвичIна ва ада хеб кьуна тухвана. Къабилаз и кар акурла адан рикI пехилвилив ацIана. Адаз Гьабил рекьиз кIан хьана, амма и кар гьикI кьилиз акъуддатIа чизвачир. И арада инсаниятдин душман тир иблис атана  ва ада меслят къалурна: кьве къван сад-сада эцягъайла, ада абур гьикI хазватIа къалурна. Адан меслятдал амал авур Къабила ксанвай Гьабилан кьилел къван гьалчна. ИкI сад лагьай иви экъична. Гьабилан вири анжах къад йис тир.

Гунагьсуз кьенвай вичин стхадин мейитдиз вуч ийидатIа чин тийиз Къабила ам сагъ йисан къене вичин кIулаллаз тухуз хьана.  Са сеферда адаз вичин вилик кьве пехъ гьикI кикIизватIа акуна ва гъалиб хьайида магълуб хьайиди чилик  кутуна. И кар акурла Къабилаз вуч ийидатIа чир хьана ва ада пехърен тегьерда Гьабил чилик кутуна, винелай накьвар хъевгьена. Адаман  (адал салам хьуй)  аялрикай сифтегьан къанлувилин гунагь рекьелай алатай Къабила авуна ва Суд-Дувандин йикъ-алди гунагьсуз кьейи вирибурун патахъай гунагь адан хиве жеда. И кIвалах Магъарату-д-Дам лугьудий Димишкъи (Дамаск) шегьердин Къасиюн дагъда хьана.

 И гунагь эхиз тахьай чил зурзана ва йикъа ирид сеферда зурзаз гатIумна ва ирид йикъан къене залзала давам хьана. И вахтунда тарарал цацар экъечIна, емишрин дад чIур хьана, акьван чIавалди ширин яд туькьуьл хьана. Гъетер ахтармишзавайбуру тестикьзавайвал, гьа и юкъуз цавал сад лагьай сеферда тум галай гъед (комета) пайда хьана. ГьакIни гъетер ахтармишзавайбурун фикирдалди Ибрагьим  (адал салам хьуй)  цIуз вегьейлани, Ад лугьудай халкь телеф авурлани, Фиръавун батмишарайлани и комета пайда хьанай. Гьакъикъат лагьайтIа, Аллагьдиз хъсандиз чида. Тестикьзавайвал, ислам пайда хьайи чIавуз Бадрдин ягъунрин вахтунда, Усманни Али (пак халифар) шагьидар яз кьейи чIавузни и гъед пайда хьана ва ихьтин аламатдин гьакъиндин себебар лагьайтIа, садазни чизвач. Алатай несилри чал агакьарайвал и гъед пайда хьайила жуьреба-жуьре дявеяр ва инсанрин арада къал-къиж жезва, падишагьар алудзава, я туш хьи, чпин гъиле къудрат авай ихьтин ксар рекьизва.

Адама  (адал салам хьуй)   вири вичин бедендалди Гьабил кьенвайди гьиссзавай ва Гьинддай хтайла Къабил жагъуриз хьана. Къабилни Икьлима катнавай ва Адам (адал салам хьуй) Гьавани галаз хажалат чIугваз амукьна. Халикьди лагьайтIа адан хажалатрал наразивал къалурун патал вагьйу ракъурна ва Аллагьдиз шукур гъунин рекьел гъана, вичиз Шис тIвар алай кьветхвердин хел галачиз тек са хва жедайдан гьакъиндай шад хабар гана. Шис чIехи хьайидалай кьулухъ Адама (адал салам хьуй)  ибадат авуниз вичин уьмуьр бахшна ва хцел лагьайтIа, амай аялрин гьакъиндай къайгъу чIугун ихтибарна.