Шалбуз дагъда авай пIир

Подробности

Автор: admin

Кьиблепатан Дагъустанда гатуз виридалайни гзаф инсанри зиярат ийизвай пIирерикай сад Сулейманан пIир я. И зиярат Докъузпара райондин дагъларикай сад тир Шалбуздагъдал ала. Четинвилериз ва яргъал тик рекьиз килиг тавуна, гьар йисуз зияратдиз, пIир Сулейманан сурал вишералди инсанар неинки чи гьукуматдай, гьакI чара гьукуматрайни физва. 

Аллагь-Тааладиз кIани лукIран – Сулейманан пIирел зиярат авун патал мусурманри яргъи ва четин рехъ атIузва. Сулейман (адалай Аллагь рази хьуй) Мугьаммад Пайгъамбардин (Аллагьдин салатни салам  хьуй адал) тайифадикай, яни Къурайшитрикай тир Абу Муслиман несилдикай я. Яргъалай килигайла, Шалбуздагъдин кIане хьиз ПIир Сулейманан сурал эцигнавай къубба алай имарат аквазва. Гьайиф хьи, шейх рагьметдиз фейи ва къуббадин имарат эцигнавай вахтуникай кхьинар жагъанвач. ПIир Сулейманакай гзаф риваятар, суьгьбетар ава. Абурукай сада лагьанва хьи, вич агъа дуьньядиз мугьман жедалди ПIир Сулеймана лагьана: «Зун кьейила зи мейит мягьфедал эцигна текдиз тур». Инсанри шейхди лагьайвал авуна. И арада лиферин са луж атана, мейит алай мягьфе цавуз хкажна ва ам гваз Шалбуздагъ галай патахъ лув гана. Ахпа абуру мягьфе исятда пIир алай чкадал эцигна. Лиферин гуьгъуьниз атай инсанри ам лифери эцигай чкадал кучудна. Лугьузва хьи, абур лиферин кIалубра авай малаикар тир.

Къейд:

Гьуьрметлу мусурманар, пIирерал фин ва абурун гьуьрметдай Аллагьдивай  тIалабун хъсан я, анжах пIирел физвайбуру эдебар хуьн чарасуз я. ПIирел физ кIанзавай дишегьлийри кьилихъ шал калчукна кIанда, беден михьиз чарадан вилерикай кIевун лазим я. ГьикI чан алай шейхдилай, алимдилай ва я вали касдилай элкъуьн, иллаки ирид сеферда, эдебсуз ятIа, гьакI кьейидалайни элкъуьн эдебсуз, ихтияр авачир амал я. Вичелай ирид сеферда элкъуьн герекди анжах Меккеда авай Кябе я! Шалбуз дагъдикай вичикай рахайтIа, бязибуру аниз пудра ва я иридра фейила са сеферда Меккедиз гьаж авур мисал жезва лугьуз инсанар алдатмишарзава, гьаж анжах Меккедин пак чилел къурмишиз жезвайди я. Маса чкада ам жезва лугьузвай кас Аллагь-Тааладиз, Адан Пайгъамбардиз (Аллагьдин салатни салам  хьуй адал) ва пак Къуръандиз акси я! Ихьтин тапарралди бязибуру чпиз и дуьньяда еке пулар къазанмишзава, амма Агъа дуьньяда абурун кIвалахар хъсан жедач.