Сив хуьникай авай хийир

Подробности

Автор: Ас-салам

Пайгъамбардин (Аллагьдин салатни  салам  хьуй адал), гьадисда лугьузва (мана): «Гьар са тамамар авур хъсан кардай Адаман хциз Аллагь -Таалади са шумуд сеферда артух сувабар гузва, абур цIудалай пудкъанни цIудав агакьна артухарзава, сив хуьнилай гъейри». Пак гьадисда (Гьадису- ль- Къудси) Аллагь-Таалади лугьузва (мана): «Гьакъикъатда, сив хуьн зун патал я. Зун патал тIуьн ва маса крар акъвазарзавайбуруз За сувабар кхьида».

 Маса гьадисда лугьузва: «Аллагь -Таалади лагьана: «Адаман хци вири крар вич патал (вич къутармиш хьун патал) ийизва, сив хуьнилай гъейри. Сив Зун патал хуьзвайди я ва Зун патал сив хвейи касдиз За сувабар кхьида».

Сив хуьн – им инсан шайтIандикай ва эхиратдин азабрикай хуьзвай къалхан я. Сив гвай чIавуз чIуру гафар лугьумир. Эгер са вуж ятIани квехъ галаз кикIиз ва я гьараяр гуз хьайитIа, адаз квев сив гвайдакай лагь. Мугьаммадан (Аллагьдин салатни  салам  хьуй адал) руьгь гвайдал кьин хьуй, сив гвай касдин сивяй къвезвай ни Аллагьдин вилик атирдилайни кIани я. Сив гвай касдиз кьве шадвал жезва – сив хкуддайла ва Аллагьдихъ галаз гуьруьшмиш жедай чIавуз. Аллагь-Таалади хиве кьазвай пишкеш – им Адахъ галаз гуьруьшмиш хьун я. Аллагьдихъ  галаз гуьруьшмиш хьун муъмин патал виридалайни еке пишкеш я. Пайгъамбарди (Аллагьдин салатни  салам  хьуй адал) лугьузва: «Сивер Аллагь паталди хуьзва ва сив хуьзвай касдиз къвезвай сувабрин кьадарни Адалай гъейри мад садазни чидач».Чаз гьадисдай акурвал, сив хуьн инсан шайтIандикай ва адан кьилел къвезвай бедбахтвилерикай хуьзвай къалхан я. ТIвар-ван авай алим Шаъраниди лугьузва: «Сив хуьникай авай хийир ва гьикмет ам я хьи, сив хуьни шейтIандиз инсандин нефсинив агакьдай рекьер кIевзава ва са сивелай муькуь сивелди шейтIандиз сив хуьзвай касдин рикIив агатдай рехъ жегъидач». «Сив хуьн – им къалхан я» лугьудай гафарин мана мадни адакай ибарат я хьи, и вахтунда инсандин къизмишвални гьевеслувал тIимил жезва, инсанди абурал гуьзчивалзава ва гунагь крар ийизвач. Гунагьрикай яргъа хьун лагьайтIа, ам мусурман Жегьеннемдин цIукай хуьдай къалхан я. Амма эгер инсанди сив хуьдай вахтунда вичиз амай йикъарилай гзаф каш гун тийиз, экуьнахъ ва няниз алазни -алачиз тIуьн нез хьайитIа, адаз сив хуьнай къвезвай суваб тIимил жезва, ада вичин рикIиз шейтIан патал рак ачухзава. ГьакIни сив хуьникай авай хийиррикай сад ада инсандин руьгьни беден михьи авун я. Чи Пайгъамбардин (Аллагьдин салатни  салам  хьуй адал) гьадисда лагьанва: «Куьне сив хуьх – куьн сагълам жеда». Инал «куьн сагълам жеда» лугьудай гафар руьгьдинни бедендин сагъламвал фикирда кьуна лагьанва. Каш гузвай инсандиз гьихьтин хийир жезватIа чаз медицинадай хъсандиз чизва. Аллагьдин шариатдал амал авуна хвейи сиви инсандин руьгьни сагъламарзава. Адан руьгьдик къадагъа краривай яргъа хьунин, кесибрин, дарда авай инсанрин язух атунин, Аллагьдикай кичIе ва Адахъ муьгьтеж хьунин ерияр акатзава. Эхиримжиди лагьайтIа, мусурмандин ерийрикай виридалайни хъсанди я.Сив хвена жезвай хийир къалурзавай гзаф гьадисар ава. За инал абурукай са бязибур гъана. Ийизвай кардал Аллагь  рази хьун патал рикIин сидкьидай ният авуна кIанда. Сив хуьдайлани ийизвай ният ам я хьи, ам анжах Аллагь патал хвена кIанда, са гьихьтин ятIани хийир къачун патал ваъ. Къуй Аллагьди чаз гзаф сивер кьаз хъсан крар артухардай мумкинвал гурай. Амин!