Куьне закай пис фикирна!
- Подробности
- Автор: Admin
Мусурманринни Меккедин бутпересрин арада Худайбиядин ислягьвилин икьрар кутIундалди Пайгъамбарди (Аллагьдин салатни салам хьуй адал) махсус векил яз Меккедин агьалийрин кьилив Усман (Аллагь рази хьуй) ракъурна. Пайгъамбарди (Аллагьдин салатни салам хьуй адал) адаз Къурайшитрал чеб дяве ийиз атун тавунвайди ва чпин мурад Кябедал кьил чIугун тирди агакьара лагьана.
Меккедин патав агакьайла, бутпересриз Усман (Аллагь рази хьуй) яна рекьиз кIан хьана. Амма бану Умайа лугьудай тухумдикай тир чи Пайгъамбардин (Аллагьдин салатни салам хьуй адал) мукьва- кьилийри ам чпин гъилик хуьзва лагьайла, адаз садани зарар ганач, акси яз, адав дуствилелди эгечIна, гьатта Кябедал элкъуьн (тIаваф) теклифна. Анжах Усмана (Аллагь рази хьуй) жаваб гана:
- Аллагьдин Расулди (Аллагьдин салатни салам хьуй адал) тIаваф тавунмаз зани ийидач. ГьакI ятIани, Худайбияда акъвазнавай мусурманрин арада хабар чкIана, на лугьуди Усмана
- Кябедилай тIаваф авуналди вун рази яз амукьнани? Усмана тIаваф авуна. И хабар асгьабри Пайгъамбардал (Аллагьдин салатни салам хьуй адал) агакьарна, ада ихьтин жаваб гана:
- Ваъ, чун инал Меккедиз ахъай тийиз бутпересри кьунвай арада Усмана вичиз секиндиз, чун галачиз тIаваф ийида лагьана за гьич фикирзавач.
- Я Пайгъамбар (Аллагьдин салатни салам хьуй адал), ам Аллагьдин КIвалин патав фенва кьван, тIаваф
авуниз адаз куь манийвал авурай? Аллагьдин Расулди жаваб гана:
- За фикирзава хьи, чна тIаваф тавунмаз ада ам ийидач. Усман асгьаб (Аллагь рази хьуй) саламат яз Худайбиядиз хтайла, асгьабри адавай жузуна:
- Кябедилай тIаваф авуналди вун рази яз амукьнани? Усмана (Аллагь рази хьуй) жаваб гана:
- Куьне закай пис фикирна. Пайгъамбар (Аллагьдин салатни салам хьуй адал) Худайбияда аваз, зун Меккеда сагъ са йисан къене амукьнавай тиртIани, за тIаваф ийидачир. Къурайшитри заз тIаваф авун теклифнай, амма зун рази хьанач. И гафарин ван хьайила, мусурманри Пайгъамбардиз (Аллагьдин салатни салам хьуй адал) лагьана: - Чакай виридакай ам виридалайни хъсандиз Аллагь чизвайди ва хъсан фикир авайди я.
(Аль-Вакиди. «Аль-Магъази»)
Добавить комментарий
