Дажлу – таб авун

Подробности

Автор: Ас-салам

Абу Гьурайрадилай (Аллах рази хьуй) агакьайвал, Пайгъамбарди (Аллагьдин салатни  салам  хьуй адал) лагьана:

«Пуд лишан ава, чеб атайдалай кьулухъ иман кьабул тийидай ва чеб  пайда жедалди мад тахьай хьтин:

1) Дажал

2) Даббат

3) Рагъ акIидай патай рагъ экъечIун

ГьакIни Пайгъамбардилай (Аллагьдин салатни  салам  хьуй адал) агакьайвал ада вичин тIалабунра лугьудай: «Я Аллагь! За вавай Масигь-Дажалакай хуьн тIалабзава»

 Имран ибн Гьуьсейналай агакьайвал, Пайгъамбарди  (Аллагьдин салатни  салам  хьуй адал) лагьана: «Адам халкь авурдалай кьулухъ Суд-дувандин йикъалди та Дажал къведалди са четин югъни жедач». «Дажал» гаф «дажлу», яни «таб авун», «акадарун», «инсанрикай таб авун» лагьай гафунилай арадал атанва. Дажал тешпигь я, адан халисан тIвар лагьайтIа, бязи алимри тестикьзавайвал, Сафийю ибн ас-Сайад я. Амма чIехи пай алимри лугьузвайвал, Дажал Сафийю ибн ас-Сайад туш. Адан лакIаб ал-Масигь я. И лакIаб адаз са вил авачирвиляй ганва. И гафунихъ гзаф манаяр ава ва Иса пайгъамбардикай (Адал салам хьуй) ихтилат кватдайла, яни чна адаз Масигь лугьудайла, и гафуниз пайгъамбарвилин дережа гузва. Месела, «масагьа» келима «кягъун, михьун» лагьай чIал я. Исадиз Масигь лагьайтIа жеда, яни а манада, «масигь» начагъбур, абурук хкIурла сагъарзавайди. Чаз чизвайвал, Исадихъ ихьтин бажарагъ авай. Дажал чи Пайгъамбардин  (Аллагьдин салатни  салам  хьуй адал) девирда Мединада хана. Ам рагъ экъечIдай патай пайда жеда, маса риваятда лугьузвайвал, Хоросандай, мадни тестикьзавайвал, гуя Константинополь кьурдалай кьулухъ Асбахандай.

Пайда хьайидалай кьулухъ ам 40 йикъан къене яшамиш жеда, са югъ са йис хьиз фида, муькуь югъ са варз хьиз, а патал алай югъ жуьмя югъ хьиз ва амай йикъарни адетдин къайдада (икI гьадисда лугьузва). Пайгъамбардилай агакьнавай са риваятда Дажал жегьилди я лугьуз тестикьзава, маса риваятра ам кьуьзуьди жеда лугьузва. Саки вири риваятра адан бедендин хамунин гьакъиндай жуьреба-жуьредаказ суьгьбетзава – садбуру ам яруди, муькуьбуру лацуди, маса риваятра лугьузва хьи, гуя мичIиди жеда лагьана. ЧIарар бурмабур жеда. Ам аскIан буйдин, патахъ кIвачер квайди жеда. Вилерин арада «каф», «фа», «ра», яни чара-чара пуд гьарф кхьенваз жеда – «кафир», инанмиш туширди. И гаф инанмиш тир вирибурувай кIелиз жеда. Адахъ аялар жедач. Ам Мединадиз, Меккадиз гьахьдач, адахъ къалин чIар алай ламни жеда.  Лам лагьайтIа, акьван чIехиди жеда хьи, адан япарин арада 20 метрдин чаравал жеда. Адан гуьгъуьнал гатанвай къалханриз ухшар чинар алай Асгьабандай тир 70 000 чувуд жеда, абурални 13 000 дишегьлийрин къацу плащар жеда. ШайтIанри адаз лугьуда: «Жуван ниятар кьилиз акъудун патал чакай хийир къачу» ва адани абурун куьмек кьабулда ва лугьуда: «Вач инсанрин патав, абур зун чпин аллагь тирдан гьакъиндай инанмишара». Сифтедай ада вири инанмишриз гьавлат жеда хьи, без вич инанмиш тир ксарикай, пакбурукай я лугьуз ва инсанар диндал гъиз гьавалат жеда. Ахпа ам Куфадиз къведа ва ина вич динэгьли хьиз къалурда, акI къалурда хьи, ам инсанриз кIан жеда ва адахъ галаз шерик жеда. Ахпа ада вич пайгъамбар я лугьуз тестикьда и вахтунда акьул тамам инсанри адаз далу гуда.  Са вахтунилай ада вич аллагь я лугьуда ва и вахтунда адан вилерин арада кафир лагьай тIвар пайда жеда. Адан са пата вил квахьда, яб галатда. И вахтунда мусурманриз дуьм-дуьз чир жеда, ам, дугъриданни, вуж ятIа, рикIе са гъвечIи кьванни иман амайди адакай яргъа жеда.

Адахъ галаз санал кьве дагъ фида, садал тарар, емишар ва яд жеда, муькуьдал – гумм, цIай ва ада лугьуда: им женнет я ва амни жегьеннем. И кардин гьакъиндай алимрин фикир сад туш. Бязибуру лугьузвайвал, бес а дагъларни, тарарни, цIай инсанрин къанажагъда акъвазнавай шикилар жеда, маса алимри тестикьзавайвал, абур, дугъриданни, гьакъикъатда жеда, яни тIебиидаказ. Адан кIвачерик чил элкъведа, яни ада чилелай гьерекатдалди къадамар яда. Ада 40 йикъан къене вири чилелай цIар илитIда. Ам вири шегьерриз гьахьда, Мединадилайни Меккадилай гъейри.

Чирвилер авачир инсанриз ада лугьуда: «Нагагь за ви бубадални дидедал чан хкайтIа, вуна зун ви аллагь я лагьана, тестикьдани?» Абуру жаваб гуда: «Эхь». И арада диде-бубадин къаматда аваз кьве шайтIан пайда жеда ва абуру лугьуда: «Алад адахъ галаз, ам куь аллагь я!» Ва абурни адахъ галаз фида. Ам вацIун патавай фидайла лугьуда: «Алахьа!» ВацIни алахьда. Ахпа вацIуз хълагь хъийида: «Элкъвена хъша!» ВацIни хкведа; лугьуда: «Кьур акъата!» ва вацIни кьурада.
 Гьадисда лугьуза: «Дажал пайда жедалди пуд йисан къене кьурамат ва каш жеда. И пуд йисан къене пудай са пай яз гьар йисуз марфар къвадач ва набататар квахьда». И вахтунда терефдарри хабар кьада: «Я Аллагьдин Пайгъамбар бес и вахтунда инсанар квелди дулан-миш жеда, вуч неда?!» Расулуллагьди (Аллагьдин салатни  салам  хьуй адал) жаваб гуда: «ТIуьнин паталай абурухъ тасбигь (Аллагьдин тариф авун) ва такбир (Аллагьдин дережа хкажун) жеда». Бинедай вил вегьейла Дажала ийидай аламат яз аквадай хьтин гзаф шейер ава, амма чпихъ рикIе иман ва чирвилер авай инсанар адахъ инанмиш жедач ва адахъ галаз фидач.

Дажалдикай гьикI къутармиш жеда?

Чирвилералдини гьерекатралди:

1. Ам недайди ва хъвадайди тирди чир хьана кIанда, Аллагь   лагьайтIа и крарикай михьи я. Адахъ са вил ава, амма Аллагь   и кардикай михьи я.  Чан аламаз Аллагь  садазни аквадач, ам (Дажал) виридаз аквада;

2. Меккада ва я Мединада къутармиш хьана кIанда, ам и шегьерриз гьахьдач, гьакIни Иерусалимда авай Масжиду-ль-Акъсадани ва Синайда авай Масжиду-ль-ТIурида, чи Пайгъамбардилай (Аллагьдин салатни  салам  хьуй адал) агакьнавай бязи риваятра лугьузвайвал, ам и мискIинриз къведач. Къуръандин 18- лагьай «Аль-Кагьф» сурадин сифегьан цIуд аят кIелна кIанда, адакай адан чиниз тфу гуз дагълар, чуьллер, къумлухар галай патахъди катна кIанда. Пайгъамбарди (Аллагьдин салатни  салам  хьуй адал) лагьана: «Нел Дажал расалмиш хьайитIа, къуй ахьтинда адан чиниз тфу гурай». Тасбигь, такбир ва я тагьлил (гафар: «Ля илягьа илля Ллагь») кIелна кIанда, гьикI хьи, ам а четин йикъара муъминар патал ризкьи жеда. Вуж ада цIаз гадарайтIа, къуй ахьтинда вилер акьална Аллагьдивай  куьмек тIалабрай, и вахтунда цIай ам паталди хатасузди ва къайиди жеда.Дажал Иса Пайгъамбарди (Адал салам хьуй) рекьида.Къуй чун Дажалдин футфадикай Аллагьди хуьрай! Амин!