Суваб гъиляй ахъаймир, суннат-ратибат кпIар ая! 4
- Подробности
- Автор: Admin
Пуд лагьайди, рагъдандин кпIунин суннатар.
Абу Дардади (Аллагь рази хьуй) Пайгъамбардин (Аллагьдин салатни салам хьуй адал) гьадис ахъайна:
«Рагъдандин кпIунин вилик кьуд ракат суннат капI ийизвай ва гьар са ракатда «аль-Фатигьадин» гуьгъуьнай «аль-Аср» сура кIелзавай касдин як Жегьеннемдин цIуз гьарам жезва».
Муавияди (Аллагь рази хьуй) ахъайнавай риваятда гьа и кьуд ракатда «аль-Фатигьадин» гуьгъуьнай «Зальзаля», «аль-Адият», «аль-Къариат» ва «ат-Такасур» сураяр кIелун меслят къалурзава.
Маса гьадисда Аллагьдин Расулди (Аллагьдин салатни салам хьуй адал) ихьтин дуьа ийизва: «Рагъдандин кпIунин вилик квай кьуд ракат суннат капI авур кас къуй Аллагьди Вичин регьимдик кутурай».
Амр бин Асама (Аллагь рази хьуй) ахъайна: «Зун Пайгъамбардин (Аллагьдин салатни салам хьуй адал) кьилив ада асгьабриз са яргъи гьадис ахъайзавай вахтунда атана. Заз а гьадисдин анжах эхирдин ван хьана: «Рагъдандин кпIунин вилик кьуд ракат суннат авур касдихъ Жегьеннемдин цIай галукьдач».
Маса гьадисда лагьанва: «Рагъдандин кпIунин вилик кьуд ракат капI авур инсандин гунагьрилай Аллагьди гъил къачузва». Пайгъамбардин (Аллагьдин салатни салам хьуй адал) папа – Умму Гьабибади ахъайна: «Аллагьдин Расулди (Аллагьдин салатни салам хьуй адал ) лагьана: «Рагъдандин кпIунин вилик гьамиша кьуд ракат капI ийизвай касдиз Аллагьди Женнетда кIвал эцигда».
Гьа и рагъдандин кпIунин вилик ийизвай ратибатар гьакI сунна я, абур суннат-муаккада дережадив агакьзавач. ГьакI ятIани куьн абурун важиблувилиз ва абур авурла гузвай сувабдиз килиг!»
катl ама...