lezgidin.ru

Нин капI Аллагьди кьабулзава?

намаз

Маса касдин рикIе вуч фикирар, ниятар аватIа? Чун, жергедин инсанар патал, ам сир я. ЯтIа вучиз чна жуван виле авай гъварциз фикир тагана масадбур тахсирлу ийиз гьерекатзава? Чна чун масадбурулай хъсанбур яз гьисабзава, такабур жезва. Аллагьдин  Расулди (Аллагьдин салатни  салам  хьуй адал) лагьана: «Арабрихъ амай миллетрин вилик Аллагьдикай  кичIе хьунилай гъейри маса артухвал авач». Яни са мусурмандин аратухвал масадан вилик адан миллетдилай, девлетдилай, къуллугъдилай ваъ,  адаз Аллагьдихъай  кичIезвай тегьердилай аслу я.

 Чун Аллагьдин  чилелай къекъвезва, Адан няметар ишлемишзава ва гьа са вахтунда Халикь  гьич рикIел хкизвач. Идалайни гъейри, гьар са кас вичелай са тIимил агъада авай кас акурла гьасятда такабурлу жезва. Я мусурманар, бес чун вири Аллагьдиз  аквазвачни? ЛукIра  Халикьдин вилик кьил агъузна, Адан лукIариз вичелай алакьазвай куьмек гуз алахъна, гьарамдикай вил яргъа авуна кIанда. Куьне фикир ая, эгер са залум кас атана куь вири малдевлет вахчуна, куьн виридан вилик виляй вегьейтIа,  куьне вуч гьиссда? Регъуьвиляй кьил хкажиз жедани? Гьа икI чна чун гьамиша тухвана кIанда, гьикI хьи, гьакъикъатда чахъ са шейни авач, вири Аллагьдин гъиле ава, Адан наразивилелай чIехи муьсуьбат авани мегер? Чна Аллагьдиз  югъди йифди шукур авуна кIанда, Ада гузвай няметрин къимет чаз чизвач.

Вичин хиве авай ферзер кьилиз акъудзавай, Пайгъамбардин (Аллагьдин салатни  салам  хьуй адал) суннадал амал ийизвай кас Аллагьдиз   кIан жеда. КапI – им мусурмандин ва имансуздин арада авай амалрин тафават я. Пайгъамбардин (Аллагьдин салатни  салам  хьуй адал) гьадисда лагьанва: «ЛукI кпIунал акъвазайла, Аллагьди  аданни Вичин арада авай «перде хкажзава» ва Вичин регьимдалди адаз килигзава. Малаикар а касдин кьулухъ акъваззава ва гьада хьиз капI ийизва, ада тIалубунар ийидайла, абуруни «амин» лугьузва. А касдал цаварилай няметар марф къвадайди хьиз къвада ва цаварай ихьтин сес акъатда: «Эгер капI ийизвай касдиз вич нихъ галаз рахазватIа чизвайтIа адан фикир Аллагьдивай  масанихъ садавайни алудиз жедачир. Гьакъикъатда, цаварин варар капI ийизвай кас патал ахъазва ва Аллагьди  гьа лукIралди малаикрин вилик дамахзава».

Айшади  ахъайна: «Пайгъамбарди (Аллагьдин салатни  салам  хьуй адал) чахъ галаз ихтилатар ийидай, анжах кпIунин вахт мукьув хьайила, заз акI жедай хьи, налугьуди, чаз садазсад гьич чидачир».Чна кпIунин вахт яргъал вегьезва ва адаз лайихлу тир фикир гузвач. КапI Пайгъамбар (Аллагьдин салатни  салам  хьуй адал) патал еке шадвал тир. Къуръанда лагьанва хьи, рикIин сидкьидай, гьакъисагъвилелди капI авур касдиз Аллагьди  Фирдаус Женнет кьисмет ийида. Герек авачир кьван вири фикирар кьиляй акъудна, Халикьдин  къудратдикай, кпIунал кIелзавай гафарин манадикай фикир ийиз хьайитIа, а касдин рикI Аллагьдин  нурди ишигълу ийида.
Ибн Аббаса (Аллах рази хьуй) гьадис агакьарна: «Давуд пайгъамбарди (Адал салам хьуй) Аллагьдивай  хабар кьунай: «Я зи Ребби, гьи касдин капI-тIеат Вуна кьабулзава?» Аллагь-Таалади адал вагьйу ракъурна: «Я Давуд,  Зи къудратдин вилик кьил агъуз ийизвай, Зун патал вичин нефсиниз тербет гузвай, гишила авай касдиз тIуьн гузвай, сиягьатчидиз вичин кIвале ксудай чка къалурзавай, четин гьалда авай касдиз куьмек гузвай касдин кпIар За кьабулзава. Эгер ада завай са шей тIалабайтIа За адаз гьасятда жавабни гуда».Къуй Аллагьди  чун гьа ихьтин инсанрикай авурай! Амин.

Лезгинский исламский просветительский портал