Дин гадармир!

Подробности

Автор: Ас-салам

Гаф сад авуна алимри лугьузва хьи, гунагь тавун хъсан кIвалах авунилай хийирлу я. ГьикI хьи, гунагь – им Аллагьдиз аси хьун я. Гунагьар кьве жуьре ава: чIехибурни гъвечIибур. ЛукIра хъсан амалар авурла, месела, капI авурла, сив хвейила, садакьа гайила ва гьакIни чIехи гунагьрикай вич хвейила Аллагьди гъвечIи гунагьрилай гъил къачузва. Амма чIехи гунагь хьайитIа, чарасуз рикIин сидкьидай туба авун лазим я. ЧIехи гунагьрикай виридалайни писди – дин гадарун я. 

И гунагь авур инсандикай кафир жезва ва ам гьамишалугъ Жегьеннемдин азабдиз лайихлу я, нагагь ада туба авуна цIийи кьилелай келима-шагьадат кIел хъувун тавуртIа. Дин гадарай кас мусурман сурара кучудзавач. Аллагь-Таалади адакай лагьанва (мана): «Дин гадарна и дуьньядай фейи инсан – кафир я! Ада авур кьван вири хъсан амалар терг жеда. Ам Жегьеннемдин агьали я ва ана ам гьамиша амукьда» («Аль-Бакъара» сура, 217-аят). Иниз килигна, чаз инсан диндай куь акъудун мумкин ятIа чир хьана кIанда. Пуд шейини инсан диндай акъудзава:

1) Мусурман умматдин алимри гаф сад авуна Исламда ферз я лагьанвай, виридаз малум тир са амал инкар авун. Месела, Рамазандин вацра сив хуьн ва я гьаж авун ферз туш лугьун. Гьарам тир шей гьалал я лугьуз тестикьарун. Месела, ички хъун гьалал я лагьайтIа ва я дастамаз галачиз капI авуртIа ам дуьз жезва лагьайтIа, инсан диндай акъатда. Гьалал тир шей гьарам я лугьун, месела, алишверишдал машгъул хьун ва я никягь авун гьарам я лагьайтIа. Пайгъамбардин гьакъикъи гьадис ва я Къуръандин аят инкар ийизвайди диндай акъатзава. Малаикрин адресдиз чIуру гафар лугьун, хашпарайрин динни гьахъ я лугьун, маса мусурмандиз «эй кафир!» лагьана эвер гун, шариатдилай гьукуматдин къанун хъсан я лугьун – ибур вири диндай акъудзавай шейэр я.

2) Анжах кафирриз хас тир са амал авун. Месела, бутдиз сужда авун. ГьакIни Къуръандиз ва диндин маса ктабриз эдеб тавун, абур чилел гадарун, чиркин чкада эцигун (нагагь хатадай Къуръан аватайтIа, гунагь авач). Гьатта Аллагьдин  ва я Адан Пайгъамбардин  тIвар, са гьадис ва я дуьа алай чар чиркин чкадиз гадарайтIани инсан диндай акъатда.

3) Исламдиз акси гафар сивяй акъудун, гьатта хъуьруьн патал хьайитIани. Диндин адресдиз чIуру гафар лугьун. Месела, «Ислам дин инсанриз кутугнавач», «закат – им пул къакъудун я», «гьижаб къадим вахтариз кутугнавай шей я», яни гуьгъуьна амай дишегьлийри алукIзавай партал. Къуръан Аллагьдин  Калам тирди инкар авун.ГьакIни ихьтин гафари инсан диндай акъудзава: «Агъа дуьнья авани мегер, анай вуж хтана?». Инсанди вичи къазанмишзавайдаз икI лугьун: «Заз ам гьалал ва я гьарам хьайитIани къайгъу авач!». Ихьтин гафарини: «И мискIинар гзаф хьайила, инсанар чIур хьанва». Мукъаят хьухь, гьуьрметлу мусурман стхаярни вахар, им чи дин я, дин кIевиз яхъ. Къуй Аллагьди  чун диндай акъудзавай амалар авуникай, гафар лугьуникай, гьатта фикиррикай хуьрай! Амин.