Ашурадин югъ

Подробности

Автор: admin

Ашурадин югъ Мугьаррамдин вацран 10 - югъ я. "Ашура" гаф "ашара" гафунилай арадал къвезва. Араб чIалай таржума авурла, "цIуд" лагьай гаф я. Мугьаррамдин варз мусурманар патал виридалайни пак варз я. Ашурадин юкъуз, гьакIни вилик галай (9-Мугьаррам) ва гуьгъуьналлай (11-Мугьаррам) йикъариз сивер кьуртIа, хъсан я (суннат я).

 Пайгъамбардин  (Аллагьдин салатни  салам  хьуй адал), гьадисрикай сада лугьузвайвал, Ашурадин юкъуз сив хвейи мусурман алатай йисанни къвезмай йисан гунагьрикай михьи жезва,

 Ашурадин юкъуз гайи са твар кьван садакьадай Аллагьди Угьуд дагъ кьван сувабар кхьизва.Ашурадин юкъуз садакьаяр пайда, мукьвакьилияр ва аялар шадарда, Къуръан кIелда ва маса хийирлу кIвалахар ийида.Аллагьди цавар, чилер, Арш, Курс, малаикар, сад лагьай инсан - Адам (Адал салам хьуй) гьа и юкъуз халкь авунва. Эхирзаманни Ашурадин юкъуз жеда. Адам пайгъамбар (Адал салам хьуй) Женнетдиз гъун ва ада авур хатадилай гъил къачун Ашурадин йикъал къвезва. Пайгъамбаррихъ (Аллагьдин салатни  салам  хьуй адал) галаз алакъалу пара бахтлу вакъиаяр Ашурадин йикъал гьалтзава.

И юкъуз Нуьгь пайгъамбардин (Адал салам хьуй) гими дуьньядал яд акьалтайдалай гуьгъуьниз Джуди дагъдин къерехрив агудна; Ибрагьим пайгъамбар  (Адал салам хьуй) дидедиз хьана; Исани Идрис пайгъамбарар (Адал салам хьуй) цаварал хутахна; Ибрагьим пайгъамбар (Адал салам хьуй)мажусийрин цIукай къутармиш хьана; Фиръаван батмиш хьана ва Муса пайгъамбар  (Адал салам хьуй) вичин юлдашарни галаз адан хурукай хкатна; Юнус пайгъамбар (Адал салам хьуй)еке балугъдин руфунай азад хьана; Айюб пайгъамбар  (Адал салам хьуй) 7 йисуз давам хьайи азардикай сагъ хъхьана; Якъуб пайгъамбар (Адал салам хьуй) вичин рикI алай хва Юсуфахъ галаз са шумуд йисарилай гуьруь-шмиш хъхьана; Сулейман пайгъамбардикай  (Адал салам хьуй) пачагь хьана; Юсуф пайгъамбар  (Адал салам хьуй)дустагъдай азадна. Ашурадин юкъуз кIелдай махсус дуьа ава. Ам чна и нумрадин кьвед лагьай чина гузва.